Ukrayna Britaniya hökumətinin kredit zəmanəti mexanizmi vasitəsilə büdcə xərclərinin maliyyələşdirilməsi üçün Dünya Bankından 500 milyon ABŞ dolları tranş alıb.
İqtisadiyyat.az TASS-a istinadən xəbər verir ki, bu barədə Ukrayna Ali Radasının Maliyyə Komitəsinin rəhbəri Daniil Getmantsev bildirib.
“Ukrayna Dünya Bankından daha 500 milyon dollar alıb. “Ukraynada davamlı idarəetmə üçün dövlət xərclərinə dəstək” layihəsi çərçivəsində maliyyələşmə Böyük Britaniyanın verdiyi kredit zəmanətləri ilə təmin edilir”, - o, özünün teleqram kanalında yazıb.
Komitə sədri qeyd edib ki, Dünya Bankından alınan kredit vəsaitləri pensiyaların və digər sosial öhdəliklərin ödənilməsinə, təhsil və səhiyyə sahələrinin fəaliyyətinin dəstəklənməsinə yönəldiləcək. “Bu ilin fevral ayından bəri Dünya Bankı Ukraynanın maraqları naminə artıq ümumilikdə 13 milyard ABŞ dolları səfərbər edib ki, bunun da 11,4 milyard dollarını ABŞ ayırıb”, - D.Getmantsev əlavə edib.
