İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti “IRŞAD ELECTRONİCS” MMC-yə maliyyə sanksiyası tətbiq edib.
Bu barədə "Report" qurumdan bildirilib.
Məlumata görə, Dövlət Xidməti antiinhisar qanunvericiliyinin tələblərinin pozulmaması və haqsız rəqabətə yol verilməməsi üçün kompleks tədbirləri davam etdirir. Bu tədbirlər çərçivəsində mobil telefon cihazları bazarında araşdırmalar zamanı təsərrüfat subyektlərinə zəruri sənəd və məlumatların təqdim olunmasına dair sorğular göndərilib.
“İnteqral” QSC, “IRŞAD ELECTRONİCS”, “Soliton LTD” və “ELCORE DİSTRİBUTİON AZ” MMC-lər sorğuda tələb olunan sənəd və məlumatları təqdim etmədiyi üçün həmin təsərrüfat subyektləri barəsində iş qaldırılıb. Bu gün “IRŞAD ELECTRONİCS”ə qarşı qaldırılan işə baxılıb, müvafiq göstərişlər verilib və təsərrüfat subyektinə qarşı maliyyə sanksiyası tətbiq edilib.
Digər təsərrüfat subyektləri üzrə işə baxılmasının nəticələri barədə məlumat veriləcək və Dövlət Xidmətinin internet səhifəsində yerləşdiriləcək.