İran Rusiyanın “AvtoVAZ” istehsalçısı ilə avtomobillərin birgə istehsalına dair müqavilə bağlamaq istəyir.
Bu barədə İran Ehtiyat Hissələri Assosiasiyasının direktorlar şurasının sədri Nəcəfi Maneş bildirib.
“Hazırda İran və Rusiya müstəsna vəziyyətdədirlər, bəlkə də, tarixdə heç vaxt bu iki ölkənin bir-birinə bu qədər yaxınlaşdığı belə bir vəziyyət olmayıb. Biz fürsətdən istifadə etməliyik, uzunmüddətli plan tərtib etməliyik ki, bu əməkdaşlıq başqa şəraitdə də davam etsin”, - deyə Maneş izah edib.
Avqustun ortalarında “Kommersant” İranın “Iran Khodro” şirkətinin avtomobillərinin Rusiyada satışının tezliklə başlaya biləcəyini yazıb. Şirkətin rəhbəri Mehdi Xətibinin sözlərinə görə, onlar artıq Rusiya tərəfi ilə bütün lazımi danışıqları aparıblar.
Öz növbəsində “AvtoVAZ” 2019-cu ildən “Lada” avtomobillərinin tədarükü ilə bağlı İranla danışıqlar aparır.
