"Dinamik inkişaf edən Azərbaycan-Macarıstan münasibətlərinin hazırkı səviyyəsi məmnunluq doğurur".
İqtisadiyyat.az xəbər verir ki, bu fikir Prezident İlham Əliyevin Macarıstanın dövlət başçısı Katalin Novaka ünvanladığı təbrik məktubunda yer alıb.
Dövlət başçısı məktubunda Macarıstan Prezidentini və xalqını ölkənin milli bayramı münasibətilə öz adından və Azərbaycan xalqı adından ürəkdən təbrik edib, ən səmimi və xoş arzularını çatdırıb.
"Yüksək səviyyəli siyasi əlaqələrimiz iqtisadi, ticari, enerji, humanitar və digər sahələrdə səmərəli qarşılıqlı faydalı əməkdaşlığımız ilə müşayiət olunur. İnanıram ki, strateji tərəfdaşlıq xarakteri daşıyan ikitərəfli münasibətlərimizin möhkəmləndirilməsi, beynəlxalq strukturlar, xüsusilə də Avropa İttifaqı çərçivəsində əməkdaşlığımızın genişləndirilməsi istiqamətində səylərimizi xalqlarımızın mənafelərinə uyğun olaraq bundan sonra da müvəffəqiyyətlə davam etdirəcəyik", - məktubda qeyd olunub.
