Afrika dövlətlərinin ümumi suveren borcu 1 trilyon dollara çatıb.
İqtisadiyyat.az xəbər verir ki, bu barədə BMT-nin Afrika İqtisadi Komissiyasının (UNECA) icraçı katibi Klaver Qeyte bildirib.
"Afrika ölkələrinin suveren borcu 1 trilyon dollar səviyyəsinə çatıb. Yüksək dövlət borcu olan hər üçüncü Afrika ölkəsi indi ciddi maliyyə problemləri ilə üzləşir", - Qeyte bildirib.
O qeyd edib ki, Afrikanın artan borc yükü uzunmüddətli güzəştli maliyyələşdirmə, rəsmi inkişaf yardımı və birbaşa xarici investisiyaların azaldığı bir vaxta təsadüf edir. Diplomat əlavə edib ki, iqlim dəyişikliyi də Afrikaya böyük təsir göstərir.
BMT-nin məlumatına görə, Zimbabve, Qana və Efiopiya hazırda ən çətin maliyyə vəziyyətindədir.
Dövlət borcunun artması təkcə Afrika ilə məhdudlaşmır. Qlobal borc monitorinqinin hesablamalarına görə, 2024-cü ilin birinci rübündə dünya ölkələrinin ümumi borcu 91,4 trilyon dollar təşkil edib.