ABŞ Prezidenti Co Bayden və vitse-prezident Kamala Harris Ağ Evdə Qəzza zolağında atəşkəslə bağlı danışıqlar aparan komanda ilə görüşüb və bölgədəki vəziyyətlə bağlı son məlumatları alıblar.
İqtisadiyyat.az xəbər verir ki, bu barədə Ağ Evin mətbuat xidməti məlumat yayıb.
"Bu gün Prezident Bayden və vitse-prezident Harris Ağ Evin Vəziyyət Otağında amerikalı Herş Qoldberq-Paulinin və digər beş girovun qətlindən sonra girovların azad edilməsinə dair razılaşma üzrə danışıqlar aparan komanda ilə görüşüblər", - deyə məlumatda bildirilir.
Ağ Evin məlumatına görə, brifinqdə ABŞ dövlət katibi Entoni Blinken, Mərkəzi Kəşfiyyat İdarəsinin direktoru Uilyam Berns, Prezidentin milli təhlükəsizlik üzrə köməkçisi Ceyk Sallivan, onun müavini Conatan Fayner, vitse-prezidentin milli təhlükəsizlik üzrə köməkçisi Fil Qordon iştirak ediblər.
Görüş zamanı Bayden və Harris ABŞ, Qətər və Misir tərəfindən irəli sürülən atəşkəs təklifi ilə bağlı yenilikləri eşidib, həmçinin qalan girovların azad edilməsi üçün atılan addımları, o cümlədən məsələ ilə bağlı vasitəçilərlə məsləhətləşmələri müzakirə ediblər.