Azərbaycanın ən böyük quru meyvə və ədviyyat idxalatçısı olan "Buta Çərəz" MMC-yə cərimə yazılıb.
İqtisadiyyat.az xəbər verir ki, Maliyyə Nazirliyi tərəfindən şirkət barəsində İnzibati Xətalar Məcəlləsinin 464-cü maddəsinə əsasən cərimə protokolu tərtib edilib.
Daha sonra protokol baxılması üçün Nizami Rayon Məhkəməsinə göndərilib və iş hakim Nəriman Mehdiyevin icraatına verilib.
Şirkətin barəsində protokol tərtib olunan maddədə deyilir ki, “Auditor xidməti haqqında” Azərbaycan Respublikasının Qanunu ilə nəzərdə tutulmuş hallarda həyata keçirilməli olan məcburi auditdən yayınmağa görə vəzifəli şəxslər üç yüz manatdan altı yüz manatadək məbləğdə, hüquqi şəxslər min beş yüz manatdan iki min beş yüz manatadək məbləğdə cərimə edilir.
Qeyd edək ki, "Buta Çərəz" MMC 25 ildir topdan və pərrakəndə satış üzrə fəaliyyət göstərir. Hazırda şirkətin tərkibində 3 topdan və 10 pərakəndə satış nöqtəsi mövcuddur. Şirkətin əsas fəaliyyət istiqamətləri quru meyvələr, çərəzlər, ədviyyatlar, dənli bitkilər,qənnadı məhsullar və çay çeşidlərindən ibarətdir. Şirkət dünyanın 40-a yaxın ölkəsi ilə əməkdaşlıq edir.