Elm adamları uzunmüddətli kosmos missiyalarının astronavtların beyninə zərər verdiyini deyirlər. İqtisadiyyat.az xarici mediaya istinadən xəbər verir ki, alimlər kosmosda uzun müddət qalacaq insanlara səyahət zamanı beyində gedəcək dəyişiklikləri bərpa etmək üçün üç illik fasilə verməyi tövsiyə edirlər. 
 
Haqqında söhbət açılan məsələ beyinin Yerin cazibə qüvvəsindən ayrılmasına necə reaksiya verdiyini tədqiq edən yeni elmi araşdırmanın nəticələridir. Marsa ilk missiyalar da daxil olmaqla, kosmosda uzun səyahətlər dönəmi gözlənildiyi üçün belə bir araşdırma həyata keçirilib. Tədqiqatçılar 30 astronavtın kosmosa getməzdən əvvəl və sonra beyin analizlərini təhlil ediblər. Nəticədə müəyyən olunub ki, 6 aydan uzun səyahətlər beyinin mədəciklərini əhəmiyyətli dərəcədə genişləndirir və onların bərpası üç ilə qədər çəkə bilər.
 
Mədəciklər beyni təkcə qoruyan və qidalandıran deyil, həm də tullantıları çıxaran maye ilə dolu beyin otaqlarıdır. Adətən bu maye funksional olaraq bədən ətrafında paylanır, lakin kosmosda cazibə qüvvəsinin olmaması mayeni yuxarıya doğru itələyə bilər. Bu isə mayenin kəllə sümüyünün yuxarısına doğru qalxmasına səbəb olar.
 
Florida Universitetinin tətbiqi fiziologiya və kineziologiya üzrə müəllimi, tədqiqatın həmmüəllifi Rachael Seidler mediaya açıqlamasında bu cümləni dilə gətirib: "Biz müəyyən etdik ki, kimsə kosmosda nə qədər çox vaxt keçirsə, beyin mədəcikləri bir o qədər böyüyür. Adətən əksər astronavtlar kosmosa bir dəfədən çox səyahət edirlər və araşdırmamız göstərir ki, mədəciklərin tam sağalması üçün uçuşlar arasında təxminən üç il vaxt lazımdır”.
 
Araşdırmada iştirak edən 30 astronavtdan 8-i kosmosa iki həftəlik, 18-i 6 aylıq, 4-ü isə bir illik səyahət edib. İki həftədən sonra beyində ciddi dəyişiklik olmadığı görünüb. Tədqiqatçılar hələ bir ildən çox səyahət edənləri öyrənməlidirlər, lakin 6-12 ay ərzində də heç bir dəyişiklik sezilməyib. Ki, bu da bu müddətli səfərlər üçün yaxşı xəbər ola bilər.