Sentyabrın 9-na olan məlumata görə dünya üzrə benzinin orta qiyməti 1 litr üçün 1,29 ABŞ dolları təşkil edir. Amma ölkələr arasında qiymətlərdə fərqlidir.

İqtisadiyyat.az-ın araşdırmasına görə, dünya ölkələri arasında benzinin ən ucuz olduğu ölkələr arasında Azərbaycan 18-ci yerdə qərarlaşıb.

Belə ki, Azərbaycanda benzinin bir litrinin qiyməti 0.647 dollar təşkil edir. Dünyada benzinin ən baha satıldığı ölkə isə Honq-Konqdur. Belə ki, burada benzinin 1 litrinin qiyməti 3,2 dollardır. Bu qiymət fərqləri benzin üçün müxtəlif vergi və subsidiyalarla bağlıdır. Nəticədə benzinin pərakəndə satış qiyməti fərqli olur.

Qeyd edək ki, son illər dünyada elektrik mühərrikli avtomobillərin istehsalı genişlənib. Genişlənməyə səbəb isə artan davamlı tələbatın olduğu göstərilir. Belə ki, elektrik mühərrikli avtomobillərə tələbat artıqca benzin və digər yanacaqla işləyən nəqliyyat vasitələrinə maraq azalıb. Azərbaycanda da son illər elektromobillərə kəskin tələb yaranıb. Əvvəllər yenilik kimi qəbul edilən bu avtomobillərə maraq gündən-günə çoxalır.

Mütəxəssislər deyir ki, planetdə hökm sürən iqlim dəyişikliyi fonunda dünyada elektromobilə keçid ekoloji tarazlığın qorunmasına xidmət edir. Bu, ekoloji mühitin qorunması, nəqliyyat emissiyalarının azaldılması və daha təmiz nəqliyyat növlərinin təşviqi ilə bağlı çağırışların tərkib hissəsidir. Ölkəmizdə elektrik mühərrikli avtomobillərə tələbat artsa da, buna keçid hələ ki ləng şəkildə davam edir. Hökumət isə keçidi sürətləndirmək məqsədi ilə bəzi tədbirlər həyata keçirir. Bu kimi tədbirlərdən biri də bir müddət əvvəl benzinin və dizelin qiymətinin dəyişdirilməsini göstərə bilərik.

Bəs dünyada benzinin qiyməti nə qədərdir?

Gözəl Həşimova