Millət vəkili Fazil Mustafa bu gün xəstəxanadan evə buraxılıb.

İqtisadiyyat.az saytı deputatla əlaqə saxlayaraq hazırki vəziyyətini maraqlanıb. Deputatın qardaşı İlqar Mustafayev saytımıza bildirib ki, onun vəziyyəti daha yaxşıdır:

“İndi evdədir. Özünü yaxşı hiss edir. Lakin həkimlər deyib ki, əməliyyata görə 6 həftə qolunu tərpətməməlidir. Artıq müalicəsi də ev şəraitində aparılacaq”.

Qeyd edək ki, martın 28-də saat 21:51-də Azərbaycan Respublikası Milli Məclisinin deputatı Mustafa Fazil Qəzənfər oğluna yaşadığı evin qarşısında - Bakı şəhəri, Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında “Kalaşnikov” konstruksiyalı avtomat silahından atəş açılaraq terror aktı törədilib.

Terror aktı nəticəsində Fazil Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb. Fazil Mustafa Dövlət Təhlükəsizliyi Xidmətinin Hərbi Hospitalına yerləşdirilib və orada bir neçə dəfə cərrahiyyə əməliyyatı olunub.

Faktla bağlı Azərbaycan Respublikası Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanılıb.