Son günlər sosial şəbəkə hesablarına qarşı haker hücumları, hesabların ələ keçirilməsi hallarına rast gəlinir. Bu günlərdə "Xalq Sığorta" ASC-nin rəsmi feysbuk səhifəsinin oğurlanması müzakirələrə çevrilib. Müzakirələrə səbəb isə ASC-nin oğurlanan rəsmi səhifəsində qeyri-etik video-paylaşımların edilməsidir. Sosial şəbəkədə müzakirə iştirakçılarının bəziləri rəsmi səhifənin oğurlanmasında "Xalq Sığorta"nın özünü günahlandırır. 

İqtisadiyyat.az xəbər verir ki, mütəxəssislər xaker hücumlarının əvvəlcədən qarşısının alınması üçün səhifələrin düzgün idarə olunmasının vacibliyini şərtləndirirlər. Onlar bunu həm də səhifələri idarə edən sosial media menecerlərinin (SMM) peşəkarlığı və məsuliyyəti ilə əlaqələndirirlər. 

Texnobloger Fərid Pərdəşünas ehtimal edir ki, "Xalq Sığorta"nın səhifəsini idarə edən SMM dələduzların qurduğu tələyə düşüb və şirkətin səhifəsi əldən gedib.

Azərbaycan İnformasiya və Kommunikasiya Texnologiyaları Sənayesi Assosiasiyasının İdarə Heyətinin sədri, İKT üzrə ekspert Elvin Abbasov isə İqtisadiyyat.az-a açıqlamasında deyib ki, əksər hallarda hesablar şantaj, pul qarşılığında geri qaytarılması, eləcə də kriptovalyutanın satışı və xarici saytların reklamı məqsədilə ələ keçirilir.

Onun sözlərinə görə, hücum olunan və ələ keçirilən hesabların hər biri müxtəlif hücum növləri və məqsədlər daşıyır. Ekspert deyir ki, hesabların oğurlanmasının başlıca səbəbi istifadəçi məsuliyyətsizliyidir: 

"Azərbaycana yönlənmiş vahid hücum növü yoxdur. Səhifələr hər bir istifadəçinin səhvləri səbəbindən və buraxılan boşluqlardan ələ keçirilir. Əgər vaxtında ikili identifikasiya sistemi tətbiq olunsaydı, səhifə ələ keçirilsə də istifadə oluna bilməyəcəkdi. Bir ilə yaxındır ki aidiyyəti dövlət qurumları və ekspertlər ikili identifikasiyanın aktivləşdirilməsi üçün çağırışlar edir. Bu ona görə vacibdir ki, hesabınız ələ keçirilsə də, orada paylaşımların edilməsi qeyri-mümkündür".

Bank məsələləri üzrə ekspert Əkrəm Həsənov İqtisadiyyat.az-a açıqlamasında sosial şəbəkə hesablarının oğurlanmasından heç kəsin, eləcə də bank və sığorta şirkətlərinin sığortalanmadığını deyib.

O hesab edir ki, bank və ya sığorta şirkətlərinin sosial media hesablarının oğurlanması onların özünə deyil, həmin sosial platformanın imicinə xələl gətirir: "Çünki sosial şəbəkə hesablarımızın oğurlanması bizdən asılı bir şey deyil. İşini yaxşı bilən xakerlərin istənilən hesabları ələ keçirmə imkanına malik olduğunu düşünürəm. Hər hansı bir bankın və yaxud da sığortaçının sosial media hesabının oğurlanmasının onun imicinə xələl gətirdiyini düşünmürəm. Bu, istifadəçilərin həmin sığorta şirkətinə deyil, məhz “Facebook” və digər internet tətbiqlərinə inamını azaldır".

Qeyd edək ki, "Xalq Sığorta" ASC-nin rəsmi "Facebook" səhifəsi haker hücumu nəticəsində oğurlanıb. Hazırda səhifədə şirkətlə əlaqəsi olmayan paylaşımlar edilir. ASC isə problemin tez bir zamanda aradan qaldırılması istiqamətində işlərin aparıldığını açıqlayıb.

Sadiq Cavadov