“Expressbank” 2024-cü ilin I rübünü 3,4 milyon manat xalis mənfəətlə bitirib.  

İqtisadiyyat.az-ın hesablamasına görə, bu, ötən ilin eyni dövrünə nisbətən 1,3% azdır. 2023-cü ilin müvafiq dövründə bank 3,44 milyon manat xalis mənfəət açıqlamışdı. 

Hesabat dövründə bankın faiz gəlirləri 21% artaraq 15,71 milyon manat, faiz xərcləri isə 26,9% artaraq 4,21 milyon  manat təşkil edib. Bu dövrdə bankın qeyri-faiz gəlirləri 11% azalaraq 4,5 milyon manata, qeyri-faiz xərcləri isə 1,3% artaraq 10,9 milyon manata bərabər olub. Beləliklə, bank bu dövrdə 5 milyon 40 min manat əməliyyat mənfəəti əldə edib ki, bu da illik müqayisədə 30% çoxdur.

Bu ilin ilk üç ayı ərzində “Ekspressbank” kiçilib. Belə ki, cari ilin aprelin 1-nə bankın aktivləri ilin əvvəli ilə müqayisədə 5% və ya 28,4 milyon manat azalaraq 531,8 milyon manata enib. Cari ilin ilk üç ayında “Expressbank”ın kredit portfeli (müştərilərə verilmiş kreditlər) 2% və ya 8,5 milyon manat artaraq 417 milyon 763 min manata çatıb. Bankın kredit portfelində istehlak kreditləri 196 milyon manat, biznes kreditləri 115.2 milyon manat, daşınmaz əmlak kreditləri isə 106.5 milyon manat təşkil edib.

Bu dövrdə “Ekspressbank”ın cəmi öhdəlikləri 398,4 milyon manat təşkil edib ki, bu da ilin əvvəlinə nisbətən 7,4% və ya 31,8 milyon manat azdır.

Şirkətlər üç ay ərzində bankdan 25 milyon manatdan çox depoziti geri çəkiblər. Belə ki, fiziki şəxslərin depozitləri ilin əvvəlinə nisbətən 3,1% və ya 4,7 milyon manat artaraq 156,9 milyon manata çatsa da, hüquqi şəxslərin (şirkətlərin) depozitləri 33% və ya 25,7 milyon manat azalaraq 52,55 milyon manata enib.

Bankın ümumi depozit portfeli də cari ilin ilk 3 ayında 9,1% və ya 20,8 milyon manat azalaraq 209,4 milyon manata enib.

2024-cü il aprel ayının 1-nə “Ekspressbank”ın cəmi kapitalı ilin əvvəli ilə müqayisədə 2,6% və ya 3,4 milyon manat artaraq 133,24 milyon manat təşkil edib.