Avstraliyanın Sidney şəhərində yerləşən ofis avadanlıqları şirkəti "Facilitate Corporation" sosial media platforması "Twitter"ə qarşı 1 milyon dollardan çox borcunu ödəmədiyini iddia edərək məhkəmə iddiası qaldırıb.
İqtisadiyyat.az Daily Mail-ə istinadən xəbər verir ki, "Facilitate Corporation" Elon Maskın 2022-ci ilin oktyabrında "Twitter"i satın aldıqdan sonra bir çox müqaviləni ləğv etdiyini və borclarını ödəmədiyini iddia edib.
2015-ci ildən bəri "Twitter"in ABŞ-dən kənar ofislərinin aparat ehtiyaclarını qarşılayan şirkət, 2022-ci ildə və 2023-cü ilin əvvəlində "Twitter"in London, Dublin və Sinqapur ofislərinə 1 milyon dollardan çox dəyərində texniki dəstək verdiyini və bu fakturaların müqavilə üzrə 60 günə ödənilməli olduğunu, ancaq hələ də ödəniş edilmədiyini bildirib.
"Facilitate Corporation" bildirib ki, Twitter borca etiraz etməyib və indiyə qədər ödəməmək üçün səbəb göstərməyib.
Sosial media şirkəti hələlik mövzu ilə bağlı açıqlama verməyib.
