Livanın baş naziri Nəcib Mikati ordunu ölkənin cənubundakı Litani çayının cənubuna göndərməyə hazır olduqlarını bildirib.

İqtisadiyyat.az xəbər verir ki, bu barədə o, paytaxt Beyrutda parlament sədri Nebih Berri ilə görüşündən sonra mətbuat konfransında deyib.

Birləşmiş Millətlər Təşkilatı (BMT) Təhlükəsizlik Şurasının 2006-cı ildə qəbul etdiyi 1701 saylı qətnaməyə diqqət çəkən Mikati söyləyib: "Biz BMT Təhlükəsizlik Şurasının 1701 saylı qətnaməsini yerinə yetirməyə hazırıq. Atəşkəs əldə edildikdən sonra Birləşmiş Millətlər Təşkilatı öz vəzifəsini davam etdirəcək. Biz Müvəqqəti Sülh Qüvvələri (UNIFIL) ilə koordinasiya etmək üçün ordunu Litani çayının cənubuna göndərməyə hazırıq”.

O, həmçinin İsraillə atəşkəsin dərhal həyata keçirilməsi ilə bağlı mövqelərini təsdiqləyib.

İntensiv hücumlarını davam etdirən İsrail Livanda atəşkəs üçün "Hizbullah Litani çayının şimalına çəkilməli və silahlarını yerə qoymalıdır" şərtini irəli sürür.

 

Sadiq Cavadov