"Təxminən 50 milyon insan gələn il ərzaq çatışmazlığı ilə üzləşə bilər, 2,5 milyondan çox insan isə aclıq astanasındadır".
İqtisadiyyat.az xəbər verir ki, bu barədə "Associated Press" BMT-nin Ərzaq və Kənd Təsərrüfatı Təşkilatının, regional və digər qrupların nümayəndələrinə istinadən məlumat yayıb.
Mənbəyə görə, Mali, Burkina Faso və Nigerdə üç il ərzində beş çevriliş baş verib və bu, Əl-Qaidə və İŞİD qruplaşması ilə əlaqəli cihadçı hücumların artmasına səbəb olub. Yaraqlılar ərazidə fəaliyyət göstərib və siyasi qeyri-sabitlikdən istifadə edərək torpaqları ələ keçirib, şəhərləri mühasirəyə alıblar.
"Bu ilin ən böyük narahatlığı təhlükəsizlik təhlükəsidir. Zərərçəkənlərə yardım göstərilməsə, insanlar ölə və vəziyyət daha da pisləşə bilər", - məlumatda qeyd edilib.
Burkina Faso, Mali və Niger arasındakı sərhəd bölgəsi Qərbi Afrikada iqlim dəyişikliyi, şiddətli daşqınlar və quraqlıqların təsiri ilə daha da şiddətlənən problemlər humanitar böhranın episentridir. BMT bölgədəki 10 milyondan çox insana yardım etməyi planlaşdırır.
"2024-cü ildə daha çox yardım göstərə bilməsək, insanlar bunun əvəzini öz canları ilə ödəyəcəklər", - məlumatda bildirilib.
