ABŞ dövlət katibi Antoni Blinken BMT-nin Narkotiklər üzrə Komissiyasının 67-ci sessiyasında iştirak etmək üçün Avstriyaya, bundan sonra həmçinin Koreya Respublikası və Filippinə səfərlər edəcək.
İqtisadiyyat.az xəbər verir ki, bu barədə jurnalistlər üçün keçirdiyi növbəti brifinqdə Dövlət Departamentinin mətbuat xidmətinin rəhbəri Metyu Miller bildirib.
Onun sözlərinə görə, cümə axşamı axşam Blinken BMT-nin Narkotiklər üzrə Komissiyasının 67-ci sessiyasının yüksək səviyyəli tədbirlərində ABŞ nümayəndə heyətinin rəhbəri kimi Vyanaya gedəcək. Dövlət katibi Millerin sözlərinə görə, təkcə ABŞ üçün deyil, digər ölkələr üçün təhlükə yaradan fentanil (sintetik opioid) və digər sintetik narkotiklərin yayılması ilə mübarizə mövzusuna toxunacaq.
"Administrasiyanın əsas prioritetlərindən biri fentanil və sintetik narkotik böhranını həll etməkdir", - Miller qeyd edib. Onun sözlərinə görə, ABŞ dövlət katibi BMT-nin Narkotiklər üzrə Komissiyasının iclasında ilk dəfə iştirak edəcək. Blinken Avstriyanın Federal Kansleri Karl Nehammer və Xarici İşlər naziri Aleksandr Şallenberqlə də görüşəcək.
Xarici siyasət rəsmisi bildirib ki, Vyanadan sonra dövlət katibi Seula gedəcək, burada üçüncü "Demokratiya Sammiti"nə qatılacaq və Manilada ABŞ-nin Filippin hakimiyyətinə "sarsılmaz dəstəyini" ifadə edəcək.
Seulda Blinken Koreyanın xarici işlər naziri Ço Tae-yeol və digər rəsmilərlə bir sıra regional və beynəlxalq məsələləri müzakirə edəcək. Manilada ABŞ dövlət katibinin Filippin prezidenti kiçik Ferdinand Markos və xarici işlər naziri Enrike Manalo ilə görüşü planlaşdırılıb. Onunla iqtisadiyyat, enerji və Cənubi Çin dənizində sülh və sabitliyin qorunması məsələləri müzakirə olunacaq.
