Bakıda yeraltı keçiddə fotoçəkilişlərin qadağan olunmasını əks etdirən lövhə quraşdırılıb.

İqtisadiyyat.az xəbər verir ki, qadağanedici lövhə paytaxtın Neftçilər prospektindəki (Kukla Teatrının qarşısında) yeraltı keçiddə yerləşdirilib.

Belə ki, keçiddəki məlumatverici lövhədə velosiped və skuter sürməklə yanaşı, fotoçəkilişlərin aparılmasının qadağan olunması da yer alıb.

Məsələ ilə bağlı Azərbaycan Avtomobil Yolları Dövlət Agentliyinə (AAYDA) sorğu ünvanladıq. Qurumun Mətbuat xidmətinin rəhbəri Anar Nəcəfli İqtisadiyyat.az-a açıqlamasında bildirib ki, velospied və ya skuteri hərəkətsiz halda keçiddən keçirmək olar. Lakin keçiddə velosiped və skuter sürmək qadağandır. Bu, qanunla tənzimlənir və şəxsə cərimə də tətbiq oluna bilər:

"Sözügedən ərazidə yerləşən yeraltı keçidlərdə velosiped və xüsusən də skuter sürülməsi piyadaların narahatlığına səbəb olur. Bununla bağlı Dövlət Agentliyinə vətəndaş şikayətləri daxil olub. Məlumat vermişik ki, həmin keçiddə velosiped və skuter sürənlərə xəbərdarlıq etmək üçün bir nəzarətçi yerləşdirilsin. Çünki bir çox vətəndaş yerləşən qadağa nişanlarından elə düşünürlər ki, velosiped və skuter sürənlər keçiddən istifadə edə bilməz. Əslində belə deyil. Sadəcə olaraq velosiped və skuter istifadə edən şəxslər keçiddən piyada kimi istifadə etməlidir". 

Çəkilişlə bağlı qadağaya gəlincə, qurum rəsmisi həmin nişanın yanlışlıqla yerləşdirildiyini söyləyib: "Yeraltı keçidlərdə çəkiliş edilməsi qadağan deyil. Ona görə də məlumat vermişik ki, həmin keçiddə qoyulan nişanı yığışdırsınlar".

Gülşən Şərif