Qafqaz Müsəlmanları İdarəsinin (QMİ) Qazılar Şurasının Ramazan ayı ilə bağlı fətvasında iftardan öncə məclislərdə ehsan verilməsinin qəti qadağan olunduğu barədə məlumat yer alıb. Fətvada din xadimlərinin diqqətinə çatdırılıb ki, Allahın hökmü, Peyğəmbərin əmri ilə ehsan adı ilə iftardan əvvəl süfrə açılması şəri baxımdan haram əməldir. Qazılar Şurası din xadimlərinin və yerlərdəki imamların nəzərinə çatdırıb ki, Ramazanın vacibatları, qayda və qadağaları, müstəhəb əməlləri barədə dindarlara ətraflı şəkildə məlumatlar və şərhlər verilsin. Amma buna baxmayaraq, yas mərasimlərində günorta saatlarında ehsan süfrələrinin təşkil olunması hallarına rast gəlinir.
Məsələ ilə bağlı QMİ-nin sədr müavini Hacı Fuad Nurullayev İqtisadiyyat.az-a fikirlərini bölüşüb.
Onun sözlərinə görə, QMİ tərəfindən Ramazan ayı boyunca yas mərasimlərində ehsan süfrələrinin iftar saatına salınması məsləhət görülüb.
Sədr müavini misal olaraq söyləyib ki, bu ay boyunca Təzəpir və Heydər məscidlərinin mərasim zallarında ehsan süfrələri yalnız iftar saatına salınır. O, həmin məscidlərdə gündüz saatlarında ehsanatın olmadığını vurğulayıb:
"Biz məsləhət görürürk ki, belə olsun. Qalan iş isə insanların ixtiyarına buraxılıb və bu tövsiyələrə əməl etmək insanların öz iman və əqidəsindən asılıdır. Allahın və Quranın dediyi budur ki, insanlar buna əməl etsələr, savab qazanarlar və rəhmətilklərin ruhları şad olar".
Milli Məclisin deputatı Fazil Mustafa isə İqtisadiyyat.az-a açıqlamasında deyib ki, ümumiyyətlə, iftar saatında da ehsan verilməsi heç məqsədəuyğun deyil.
O, yas mərasimində iştirak edənlər arasında oruc tutanlarla tutmayanları nəzərə almağın vacibliyini söyləyib: "Fikrimcə oruc tutanlar bir tərəfdə, çay içənlər isə başqa bir tərəfdə otursunlar və yemək ehsanı verilməsin. Yaxşı olar ki, adamlar saat 3-4-ə qədər hansısa bir mərasim evinə yığışsınlar. Saat 3-4-dən sonra gedib öz evində iftarını açsın. Nədir bu hoqqabazlıq? Bunların hamısını insanlar özləri uydurublar. Yas mərasimlərini hoqqabazlığa və bütövlükdə insanlar üçün əziyyətə çevirmişik. Bu əziyyətdən insanlar özləri qurtarmalıdırlar. Qafqaz Müsləmanları İdarəsi də tövsiyə edir ki, heç olmasa axşam iftar süfrəsi verilsin. Mənim fikrimcə, heç axşam da iftar süfrəsinə ehtiyac yoxdur. Yaxın adamlar yığışıb iftar açarlar. Yoxsa, yas sahibi məcbur olub saat 8-ə qədər gözləyir ki, adamlar gələcək, iftar açacaqlar. Belə bir yanaşma mı olar?"
Deputat qeyd edib ki, bu məsələlərdə bir az fərqli yanaşma ortaya qoyulmalı və yemək ehsanı verilməsi ənənəsi yığışdırılmalıdır.
Tövsiyələrin hamısın xoşniyyətlə edildiyini deyən deputat bildirib ki, insan özü özünə zərər vura biləcək addımlardan çəkinməlidir: "Fikrimcə, burada problem elə əslində bizim özümüzlə, insanlarımızla bağlıdır. Burada hansı məcburiyyət, hansı tələb var? Bu, dinin, yaxud cəmiyyətin tələbidir? Belə bir şey yoxdur. Heç başqa vaxtlarda da yemək ehsanı verilməsi tam mənasız bir işdir. Amma nə edə bilərik?!. İnsanlar bir az həm şöhrətpərəstlik, həm də ənənə mövhumatçılığı yaşayırlar və bunu dəyişmək olmur. Heç olmasa Ramazan ayında gəlib başsağlığı verib getsinlər. Mütləq axşam bir də gəlməlidir? İnsanlara niyə əziyyət verilir? Yas sahibinə niyə əziyyət verilir? Tamamilə mənasız və heç bir əlaqəsi olmayan məsələlərdir. Təbii ki, mən Qafqaz Müsəlmanları İdarəsinin tövsiyəsini xoşniyyətli addım kimi qiymətləndirirəm. Onlar insanların inciməməsini, heç olmasa bu qaydalara əməl etmələrini istəyirlər. Amma bütövlükdə mən cəmiyyəti bundan imtina etməyə çağırıram. Axşama iftar lazımdırsa, 5-10 nəfər qohum-əqrəba yığışar, iftar süfrəsində oturarlar. İnsanları bir də saat 7-dən sonra harasa dəvət eləmək nə dərəcədə doğrudur?".
Sadiq Cavadov
