Türkiyə və Yunanıstan nümayəndələri İstanbulda keçirilən görüşdə ticarət, iqtisadiyyat, nəqliyyat, təhsil, texnologiya, ətraf mühit və səhiyyə sahələrində qarşılıqlı əməkdaşlıq məsələlərini müzakirə ediblər. 

İqtisadiyyat.az xəbər verir ki, bu barədə Yunanıstan Xarici İşlər Nazirliyi məlumat yayıb.

"Türkiyə xarici işlər nazirinin müavini Burak Akçapar və Yunanıstan xarici işlər nazirinin iqtisadi diplomatiya və xarici əlaqələr üzrə müavini Kostas Francoyannis iki ölkə arasında müsbət əməkdaşlıq gündəliyi çərçivəsində Birgə Fəaliyyət Planı üzrə müzakirələrin 6-cı raundunu keçirmək üçün İstanbulda görüşüblər. Görüşdə ticarət, iqtisadiyyat, nəqliyyat, təhsil, texnologiya, ətraf mühit və səhiyyə sahələrində gündəlikdə duran çoxsaylı müsbət mövzulara ətraflı baxılıb, bir çox mövzuların uğurla həyata keçirildiyi və qənaətbəxş olduğu bildirilib, bir digərləri üzrə irəliləyiş əldə edilib", - deyə məlumatda bildirilir.

Xarici İşlər Nazirliyindən bildirilib ki, bu dinamik və davam edən prosesdə əldə edilmiş əhəmiyyətli irəliləyişləri nəzərə alaraq, hər iki tərəf müsbət gündəm çərçivəsində əməkdaşlığın əlavə tematik sahələrini araşdırmaq barədə razılığa gəlib: "Hər iki tərəf baş nazir Kiriakos Mitsotakisin may ayında Türkiyəyə gözlənilən səfəri ilə bağlı Birgə Fəaliyyət Planı vasitəsilə konkret nəticələrin təmin edilməsinə dair ümumi məqsədlərini bir daha təsdiqləyib".

Aprelin 22-də Türkiyə və Yunanıstan nümayəndə heyətləri Afinada etimad tədbirlərinə dair müzakirələrin növbəti mərhələsini keçiriblər. Görüşü Yunanıstanın Müdafiə Nazirliyi təşkil edib. Tərəflər 2024-cü il üçün əvvəlcədən razılaşdırılmış etimad quruculuğu tədbirlərini nəzərdən keçirib və 2025-ci il üçün planı müzakirə ediblər. Növbəti görüşə Türkiyə tərəfi ev sahibliyi edəcək.