"Yelo Bank"ın depozit portfelində bu ilin ilk rübündə 455 milyon manata yaxın azalmanın səbəbləri məlum olub.
İqtisadiyyat.az-ın əldə etdiyi məlumata görə, bankın İdarə Heyətinin sədr müavini Emil Duşdurov bu məsələyə aydınlıq gətirib.
O, bu fərqin bank üçün gözlənilən olduğunu söyləyib: "Çünki bir neçə müştərimiz qısamüddətli məqsədləri üçün əmanət hesabları açmışdı. Maliyyə sferasında, xüsusən də böyük müştərilərlə işləyən banklarda müvəqqəti dövrlər üçün yaradılmış əmanətləri idarə etmək adi haldır. Uzun sözün qısası, bu halın ümumi maliyyə sabitliyimizə, müştərilərimizə və xidmət keyfiyyətimizə heç bir təsiri olmayacaq. Eyni zamanda, biz xərcləmələrimizə də nəzarət etməyi planlayaraq daha adekvat xərc-gəlir əmsalına çatmağı düşünürük".
Qeyd edək ki, bankın ümumi depozit portfeli ilin əvvəlindəki 1 mlrd. 292 mln. manatdan 1 aprel 2024-cü il tarixinə 837,2 mln. manata enib. Hüquqi şəxslərin bankdakı əmanətləri ilin ilk üç ayında 720,6 milyon manatdan 213,8 milyon manata enib. Bu isə portfelin 506,2 milyon manat azalması deməkdir. Bu dövrdə əhalinin bankdakı əmanətlərinin 571,4 milyon manatdan 623,48 milyon manata yüksəlməsi ümumi portfel üzrə kəskin azalması nisbətən kompensasiya edib.
