"Son illərdə respublikamızda qeyri-neft, qaz sektoruna göstərilən yüksək dövlət qayğısı nəticəsində iqtisadiyyatın aparıcı sahələrindən biri olan aqrar sahə də keyfiyyət və yeni inkişaf mərhələsinə keçid üçün əsaslı zəmin yaranıb və ölkənin ərzaq təhlükəsizliyinin təmin olunması məqsədilə mühüm addımlar atılıb".

İqtisadiyyat.az xəbər verir ki, bunu kənd təsərrüfatı nazirinin müavini Sarvan Cəfərov bu gün  Yevlaxda “İqlim dəyişikliyinə adaptasiya edən torpaq və resurs qoruyucu yeni texnologiyaların nümayişi" mövzusunda keçirilən respublika müşavirəsində deyib.

O bildirib ki, Prezident İlham Əliyev tərəfindən kənd təsərrüfatı məhsulları istehsalının səmərəliliyinin artırılması, məhsul istehsalçılarına dövlət dəstəyinin göstərilməsi və digər aqrar sahənin inkişafı istiqamətində atılan addımlar, imzalanan sərəncamlar və verilən tapşırıqlar aqrar sektorda istehsal göstəricilərinin davamlı olaraq yüksəldilməsini stimullaşdırmaqla innovativ texnologiyaların tətbiqi imkanlarını genişləndirib:

"Bu gün aqrar sahənin inkişafı istiqamətində həyata keçirilən tədbirlərin müasir texnologiyalar və elmi əsaslar üzərindən aparılması olduqca aktualdır. Məlum olduğu kimi ölkəmiz torpaq və su resursları məhdud olan ölkələr qrupuna aiddir. Belə ki, torpaqların uzun müddət ənənvi üsullarla becərilməsi, qlobal iqlim dəyişmələrinin təsiri, torpaqların deqradasiyaya uğraması, şoranlılığın artması, su resurslarının azalması kənd təsərrüfatı məhsullarının istehsalını ciddi təhdidlərlə üz-üzə qoyur. Buna görə də yaranmış çətinliklərin aradan qaldırılmasında torpaq qoruyucu resurslardan istifadə edilir, texnoloji əməliyyatların rəqəmsal basdırılması və təbii əkinçilik sistemlərinin tətbiq olunması xüsusi önəm kəsb edir". 

Nazir müavini xatırladıb ki, bu il respublikamız BMT-nin iqlim dəyişikliyi üzrə 29-cu çərçivə konvensiyası üzrə tərəflər konfransına ev sahibliyi edəcək:

"COP-29"un Azərbaycanda aqrar və ekoloji siyasətlərin qabaqcıl beynəlxalq təcrübələrə, texnoloji mübadilə innovasiyalara uyğunlaşdırılmasında mühüm rolu olacaq. Bu istiqamətdə innovativ yanaşmaların və alətlərin istifadəsi ətraf mühitin qorunması ilə yanaşı kənd təsərrüfatına davamlılığın,ekoloji təmiz ərzağa,habelə kənd yerlərində əhalini rifahının artırılmasına öz töhvəsini verəcək. Həmçinin iqlim dəyişmələrinə qarşı qlobal mübarizələr beynəlxalq həmrəyliyin gücləndirilməsi məqsədilə Azərbaycan Respublikası Prezidentinin müvafiq sərəncamı ilə 2025-cü il ölkəmizdə "Yaşıl dünya naminə həmrəylik" ili elan olunmuş, müvafiq məqsədlərlə ölkəmizdə bir sıra beynəlxalq və yerli tədbirləri həyata keçirilməkdədir".

S.Cəfərov vurğulayıb ki, ölkədə kənd təsərrüfatı sahəsində innovasiyaların tətbiqi ilə bağlı çoxsaylı təcrübələr yaranıb: 

"Belə ki, Kənd Təsərrüfatı Nazirliyinin tabeliyində olan elmi tədqiqat institutları tərəfindən təcrübə xarakterli, özəl şirkətlər tərəfindən isə kommersiya məqsədi ilə layihələr həyata keçirilib, torpaq və su resurslarının səmərəli istifadə olunması baxımından ağıllı suvarma sistemlərinin, aqrodronların, aqrorobotların və dəqiq əkin texnologiyalarının nümayiş etdirilməsi və təcrübə sahələrində onların tətbiqinin əyani şəkildə həyata keçirilməsi çox mühüm əhəmiyyət kəsb edir. 
Kənd təsərrüfatında innovativ texnologiyaların tətbiqi aqrar sektor haqqında təsəvvürlərin dəyişməsinə və onun daha da çox gəlirli, səmərəli bir sahəyə çevirir. Bu gün təsərrüfatda rəqəmsal texnologiyalarla böyük mənfəətlər əldə edirlər. Bu texnologiyalar kənd təsərrüfatında məhsul istehsalçılarına dəqiq əkinçiliyin həyata keçirilməsinə, sudan daha səmərəli istifadə edilməsinə, rəqabət qabiliyyətli məhsul istehsalına, eləcə də ətraf ekosistemə mənfi təsirlərin aradan qaldırılmasına imkan verir".

Sadiq Cavadov