Aparılan ardıcıl və sistemli iqtisadi islahatların ən mühüm istiqamətlərindən birini dövlət əmlakının qorunması və dövlət mülkiyyətinin özəlləşdirilməsi təşkil edir.
İqtisadiyyat.az xəbər verir ki, bunu Naxçıvan Muxtar Respublikanın iqtisadiyyat nazirinin müavini, nazir vəzifələrini müvəqqəti icra edən Abbas İsmayılov deyib.
Onun sözlərinə görə, dövlətin iqtisadi siyasətinin əsas məqsədlərinə uyğun olaraq muxtar respublikada özəlləşdirmə prosesi 2024-cü ilin yanvar - iyun aylarında da uğurla davam etdirilib, 102 dövlət əmlakının özəlləşdirilməsi başa çatdırılıb, daşınmaz dövlət əmlakının istifadəsi ilə bağlı 30-u qeyri-yaşayış, 29-u isə torpaq sahəsi üzrə olmaqla 59 icarə müqaviləsi bağlanıb:
"Özəlləşdirmədən daxil olan vəsait isə ötən ilin 6 ayına nisbətdə 7,5 dəfə artmışdır. Dövlət əmlakının icarəsindən dövlət büdcəsinə daxilolmalar ötən ilin eyni dövrü ilə müqayisədə 65,8 faiz çoxdur. Göründüyü kimi, banklar üçün maraqlı olan Naxçıvanda dövriyyələrin leqallaşdırılması prosesi sürətlə davam edir. Hərraclar özəlləşdirmənin ən geniş tətbiq olunan üsullarındandır. Hazırda hərracların əhatə dairəsi genişləndirilmiş, muxtar respublikada aidiyyatı dövlət qurumları, bələdiyyələrlə müqavilələr bağlanılmış, şəffaf və rəqabətli hərracların keçirilməsinə başlanılmışdır. Onu da nəzərinizə çatdırım ki, Naxçıvanda innovativ yenilik və xüsusi model olan elektron hərracın tətbiqi məqsədilə müasir infrastrukturun qurulması nəzərdə tutulmuşdur.Cari ilin mart ayından dövlət əmlakının reyestrinin elektron sistem üzərindən aparılmasına başlanmışdır.
2023-cü ilin 6 ayı ilə müqayisədə 2024-cü ilin 6 ayında qeydiyyata alınmış torpaq sahələri 28 faiz, qeyri-yaşayış sahələri 33,7 faiz, daşınmaz əmlakla bağlı əməliyyatların aparılması üçün daxil olmuş müraciətlərin sayı 10,4 faiz çoxalmışdır".
