“ƏDV geri al” layihəsi çərçivəsində 2023-cü il və 2024-cü ilin 6 ayında istehlakçılara 1,5 milyon manatdan çox ƏDV məbləği geri qaytarılıb, cari ilin 6 ayında "ƏDVgerial" üzrə istehlakçılara qaytarılmış məbləğ ötən ilin eyni dövrü ilə müqayisədə 2,3 dəfə artaraq 670,8 min manat olub.

İqtisadiyyat.az xəbər verir ki, bunu Naxçıvan Muxtar Respublikanın iqtisadiyyat nazirinin müavini, nazir vəzifələrini müvəqqəti icra edən Abbas İsmayılov deyib.

Onun sözlərinə görə, 2024-cü ilin 6 ayında Naxçıvan, Şərur və Ordubad şəhərlərində fəaliyyət göstərən Vergi ödəyicilərinə xidmət mərkəzləri tərəfindən ümumilikdə 17.683 şəxs qəbul edilib və onlara 22.922 xidmət göstərilib. 

Qeyd edilib ki, bu da ötən ilin eyni dövrü ilə müqayisədə 27,2 faiz çoxdur:

"Mərkəzlərdə göstərilən xidmətlərdən məmnunluq (tam razılıq) səviyyəsi 98,4 faiz, xidmətlərdən razılıq səviyyəsi isə 99,7 faiz təşkil edir".