İranın ali dini lideri Ayətullah Əli Xameneinin İslam Respublikasının Ali Milli Təhlükəsizlik Şurasındakı nümayəndəsi Səid Cəlili növbədənkənar prezident seçkilərində namizəd kimi qeydə alınıb.
"Operativ Media" xəbər verir ki, bu barədə İRNA agentliyi məlumat yayıb.
"Tərəqqiyə nail olmaq üçün insanların seçkidə maksimum iştirakı və ədalət lazımdır ki, hər kəs inkişaf etmək imkanına malik olsun və bu gün İran Prezidenti şəhid İbrahim Rəisinin yolu ilə getdiyimizə nail olmaq üçün düzgün və vaxtında qərarlara ehtiyacımız var", - deyə siyasətçi qeyd edib. Cəlili mətbuat konfransında öz proqramının təyyarə qəzasında həlak olan Rəisinin kursu ilə davam edəcəyini vurğulayıb.
59 yaşlı Cəlili İranın şimal-şərqində, Rəisinin doğulduğu Məşhəddə anadan olub. Siyasətçi geniş təcrübəyə malikdir və seçkilərdə əsas namizədlərdən biri hesab olunur. O, iki dəfə prezidentliyə namizəd olub. 2013-cü ildə o, ümumi səslərin 11,35%-ni toplayaraq üçüncü yeri tutmuş, 2021-ci ildə Rəisinin lehinə namizədliyini geri götürmüşdür. Cəlili İran Təhlükəsizlik Şurasında ruhani liderin nümayəndəsi kimi fəaliyyət göstərməklə yanaşı, parlament və parlamentdən yuxarı Konstitusiyanın Mühafizə Şurası arasında mübahisələri həll edən məsləhət orqanı olan Siyasi Məqsəd Şurasında yer alır.
Qərbə qarşı sərt siyasəti ilə yadda qalan prezident Mahmud Əhmədinejadın dövründə Cəlili Ali Milli Təhlükəsizlik Şurasının katibi vəzifəsində çalışıb və eyni zamanda Tehranın nüvə proqramı üzrə əsas İran danışıqçısı olub. Hazırda İranın xarici siyasət strategiyasının hazırlanmasına cavabdeh olan Xarici Əlaqələr üzrə Strateji Şuranın işində də iştirak edir.
