Azərbaycanda mühafizə fəaliyyəti göstərən "Vətən-N Mühafizə Xidməti" Məhdud Məsuliyyətli Cəmiyyətində nöqsanlar aşkarlanıb.
İqtisadiyyat.az xəbər verir ki, Əmək və Əhalinin Sosial Müdafiəsi Nazirliyi (ƏƏSMN) yanında Dövlət Əmək Müfəttişliyi Xidməti (DƏMX) daxil olan müraciətlər əsasında şirkətdə yoxlama aparıb.
Yoxlamalar zamanı şirkətin işçiləri əmək müqaviləsi bağlamadan işə cəlb etdiyi aşkarlanıb.
Buna görə qurum şirkət barəsində İnzibati Xətalar Məcəlləsinin 192.1-ci maddəsinə əsasən cərimə protokolu tərtib edib.
Daha sonra protokol baxılması Xəzər Rayon Məhkəməsinə göndərilib. İş hakim Ramilə Xəzrinin sədrliyi ilə araşdırılacaq.
Məhkəmə protokolu təsdiq edərsə, “Vətən-N Muhafizə Xidməti” 25 000 manatadək cərimələnəcək.
Şirkətin barəsində protokol tərtib olunan maddədə deyilir ki, əmək müqaviləsi (kontraktı) hüquqi qüvvəyə minmədən işəgötürən tərəfindən fiziki şəxsləri hər hansı işlərin (xidmətlərin) yerinə yetirilməsinə cəlb edilməsinə görə fiziki şəxslər min manatdan iki min manatadək məbləğdə, vəzifəli şəxslər üç min manatdan beş min manatadək məbləğdə, hüquqi şəxslər iyirmi min manatdan iyirmi beş min manatadək məbləğdə cərimə edilir.