Azərbaycanda koronavirusa yoluxanların sürətlə artması və karantin müddəti bitən şəxslərin yenidən yoluxması insanları təşvişə salıb.
Bu barədə sosial şəbəkələrdə paylaşımlar edilib. Bəs görəsən ümumiyyətlə virusa yoluxan şəxs karantin müddəti bitdikdən sonra yenidən yoluxa bilərmi? Məsələ ilə bağlı Yeniavaz.com-a açıqlama verən Respublikanın baş infeksionisti, ATU-nun Yoluxucu xəstəliklər kafedrasının dosenti Cəlal İsayev bildirdi ki, koronavirus infeksiyasından sonra immunitet yaranır. Amma təkrar xəstələnmə ehtimalı qalır: “Bəzi mütəxəssilər deyir ki, davamlı immunitet yaranır, bəziləri isə deyir təkrar xəstələnmə olur. Bu infeksiya yenidir. Sağalan şəxslər yenidən yaranıb yaranmaması ilə bağlı məlumatımız yoxdur. Ola bilər ki, xəstə sağalıb 2 dəfə müayinədən sonra nəticəsi olub və evə buraxılıb və yenidən yoluxub. Belə olan halda deyə bilmərik bu yenidən yoluxmadır, yoxsa orqanizmə virus qalıb, təzədən baş qaldırıb. Bu biraz müəmmalıdır. Sağalan şəxslər evə buraxıldıqdan sonra sahə həkiminin nəzarətində olur”.
