Milli Məclisin Mədəniyyət Komitəsinin sədri, deputat Qənirə Paşayeva sentyabrın 28-də müalicə olunduğu Mərkəzi Klinik Xəstəxananın reanimasiya şöbəsində vəfat edib. Naməlum mənşəli hipotonik vəziyyət diaqnozu qoyulan Q.Paşayevanın səhhətindəki kritik durumla əlaqədar Mərkəzi Klinik Xəstəxananın həkim personalı və Türkiyədən cəlb edilmiş həkim mütəxəssislər tərəfindən görülmüş bütün zəruri tədbirlərə baxmayaraq millət vəkilinin həyatını xilas etmək mümkün olmayıb. Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın tapşırığına əsasən, millət vəkili Qənirə Paşayevanın dəfni ilə bağlı məsələlər nəzarətə götürülüb.

İqtisadiyyat.az xəbər verir ki, deputat Qənirə Paşayevanın vəfatı ilə bağlı həmkarları və digər ictimai nüfuzlu şəxslər öz təəssüratlarını bölüşüblər.

Milli Məclisin deputatı Arzu Nağıyev bildirib ki, Qənirə Paşayeva fədakar insan olmaqla yanaşı, hər kəsə dəstək olmağı bacarırdı:

"Qənirə Paşayeva tək Azərbaycanda yox, bütün türk dünyasında sevilir". 

Deputat  Azay Quliyevin sözlərinə görə, Qənirə Paşayeva olduqca vətənpərvər bir insan idi:

"Azərbaycanın əsl vətənpərvər xanımını itirmək təkcə parlament üçün deyil, eləcə də xalqımız üçün böyük itkidir".

Qənirə Paşayevanın hər bir insanın qəlbində yaşayacağını bildirən deputat Aydın Hüseynov vurğulayıb ki, o, Vətənə bağlılığı ilə seçilirdi:

 "Qənirə Paşayeva öz imzasını xalqın tarixinə yazdı. O, xalqını sevən insan və dövlətçiliyə bağlı olan insan idi".

Deputat Naqif Həmzəyev sosial şəbəkədə hesabında paylaşım edərək "Ruhun şad olsun gözəl insan, əziz Qənirə xanım! Allah rəhmət eləsin!", deyə başsağlığı verib.

Eyni zamanda deputat Azər Badamov sosial şəbəkə hesabında "Gözəl bir insan, dəyərli bir həmkarımızı  təəssüf ki, itirdik. Allah rəhmət eləsin!", deyə paylaşım edib. 

Bu acı xəbərin hər kəsi pərişan etdiyini bildirən deputat Fazil Mustafanın sözlərinə görə, Qənirə Paşayeva həmkarlarının xatirəsində unudulmayacaq bir iz buraxdı:

"Azərbaycanın fədakar övladı, Milli Məclisin Mədəniyyət Komitəsinin sədri, əziz Qənirə xanım Paşayeva dünyasını dəyişdi. Qənirə xanıma Allahdan rəhmət diləyir, əzizlərinə və onu sevən minlərlə Azərbaycan insanına başsağlığı diləyirəm. Dövlətimiz və millətimiz üçün gördüyü işlər hər zaman rəğbətlə anılacaqdır. Ruhu şad olsun!".

Milli Məclisin deputatı Bəhruz Məhərrəmov həmkarı Qənirə Paşayevanın vəfatından kədərləndiyini qeyd edib:

"Azərbaycan Respublikası Milli Məclisinin deputatı, Parlamentin Mədəniyyət komitəsinin sədri Qənirə Paşayevanın vəfatı hamımızı kədərləndirdi. Allahdan mərhum həmkarımıza rəhmət, ailəsinə, yaxınlarına isə başsağlığı diləyirik".

Milli Məclisinin sabiq sədr müavini, Ailə, Qadın və Uşaq Problemləri üzrə Dövlət Komitəsinin sədri Bahar Muradova isə öz kədərini şeirlə ifadə edib:

"Ömür dedikləri...
Ömür ötüb keçdi səndən xəbərsiz,
Sanki arxasınca capar gəlirdi.
Nəfəsin köksündə bir quş misalı,
Uçub  bir andaca  səni tərk etdi.
Saxlaya bilmədin  bircə anı da,
O nə səninkiydi, nə də heç kimin.
Sürətlə dəyişən vaxt axarında,
Parlaq bir  zərrə tək qeybə çəkildin.
Ortada qalansa bir təsəllidir,
Səninlə zamanın əlaqəsindən.
Doğaraq səhərə zərrin şəfəq tək.
De ki, bu dünyadan sən də kecmisən".

Türkiyənin Azərbaycandakı səfiri Cahit Bağçı Milli Məclisinin deputatı Qənirə Paşayevanın vəfatı ilə bağlı başsağlığı verib:

"Hörmətli atası Ələsgər bəyə, ailəsinə və yaxınlarına ölkəmiz və xalqımız adından başsağlığı verir, səbir diləyirik. Allah rəhmət eləsin, qəbri nurla dolsun".

Türkiyənin səhiyyə naziri Fəxrəddin Qoca da sosial şəbəkə hesabında paylaşım edərək deputat Qənirə Paşayevanın türk dünyasına böyük xidmətlər göstərdiyini vurğulayıb:

"Təəssüf ki, Azərbaycan Respublikasının millət vəkili Qənirə Paşayeva Bakıda müalicə aldığı xəstəxanada dünyasını dəyişib. Allah rəhmət eləsin, ailəsinə və yaxınlarına başsağlığı verirəm.Türk dünyasına böyük xidmətlər göstərdi. İnanıram ki, onun adı həmişə xatırlanacaq. "Salam olsun türk dünyasına!", "Salam Azərbaycan, Türkiyəmizə salam olsun". Türk dünyası üçün hər zaman mübarizə aparan qəhrəman Qənirə Paşayevanı bu sözlərlə xatırlayacağıq".

 Türkiyənin kənd təsərrüfatı və meşə naziri İbrahim Yumaklı da öz növbəsində Azərbaycan xalqına başsağlığı verib:

"Allah rəhmət eləsin. Bir millət, iki dövlət olaraq əziz xalqımıza başsağlığı verirəm".

Qeyd edək ki, millət vəkili səhhətində yaranmış ciddi problemlərlə əlaqədar sentyabrın 23-dən Mərkəzi Klinik Xəstəxananın reanimasiya şöbəsinə yerləşdirilmişdi.

Gülşən Şərif