Finlandiya Rusiya ilə sərhəddə yerləşən İmatra kəndi yaxınlığında hasarın sınaq hissəsinin tikintisini başa çatdırıb.
İqtisadiyyat.az dünya mətbuatına istinadən xəbər verir ki, bu barədə "Yle TV" kanalı məlumat verib.
Kanalın məlumatına görə, işlərin böyük hissəsi başa çatıb və Cənub-Şərqi Finlandiya Sərhəd Mühafizə Xidmətinin zabitləri hasarın olduğu ərazidə növbə çəkirlər. Qeyd edilib ki, inşaat işlərinin hələ də tamamlanmalı olduğu bəzi kiçik işlər var, lakin hasarın əsas elementləri, o cümlədən maneə, bitişik yol səthi və idarəetmə sistemləri artıq hazırdır.
Layihə meneceri İsmo Kurkinin sözlərinə görə, hasarın tikintisi avqustun ortalarında başa çatıb, lakin tamamlama işləri ilə əlaqədar onun istismarı təxirə salınıb.
Qeyd edək ki, 2022-ci ilin iyununda Finlandiyanın Daxili İşlər Nazirliyi hökumətin ölkəni “miqrasiya problemləri ilə bağlı siyasi təzyiq” də daxil olmaqla “hibrid təhlükələrlə” üzləşməyə hazırlamaq üçün Rusiya ilə şərq sərhədinin kritik hissələrində maneələr quraşdırmaq niyyətində olduğunu açıqlayıb. Fevral ayında Finlandiya Rusiya ilə sərhədinin İmatra sərhəd keçidi yaxınlığında hasarın üç kilometrlik “sınaq hissəsi”nin tikintisinə başlayıb. Tikilməkdə olan hasar texniki nəzarət sistemləri ilə təchiz olunacaq.
