“Azərbaycanda koronavirus testləri xüsusi laboratoriyalarda keçirilir”.
Bu sözləri Yeniavaz.com-un bu barədə sorğusunu cavablanırarkən TƏBİB-in mətbuat katibi Rəvanə Əliyeva deyib. O bildirib ki, cavabların bəlli olması müddəti isə müxtəlifdir:
“Azərbaycanda koronavirus testləri xüsusi laboratoriyalarda keçirilir. Cavabların bəlli olması vaxtı isə müxtəlifdir. O laboratoriyanın yüklənməsindən asılı olaraq dəyişir. Pozitiv olanda zatən həmin şəxsi gəlib götürürlər. Hələ ki, neqativlərin cavabı deyilmir”.
R. Əliyeva bildirdi ki, kimlərin koronavirus testindən keçməsi isə, bununla bağlı 103-ə daxil olan məlumatlardan asılıdır:
“Kimsə özündə xəstəlik əlamətləri hiss edirsə 103-ə zəng vurur (Bakıdan kənar 113-ə), əlamətlərini deyir. Suallar əsasında çağırış ya qəbul olunur, ya qəbul olunmur. Çağırış qəbul olunarsa evə təcili tibbi yardım gəlir. Evdə müayinədən sonra həkim qərar verir ki, ondan analiz üçün nümunə götürülsün, yoxsa yox. Nümunə götürüldüyü halda həmin şəxsə nümunənin cavabı çıxana qədər ev karantini tətbiq olunur. Neqativdirsə həmin adam gedib özü soyuqdəymə müalicəsi alır. Yox əgər, pozitivdirsə, gəlib onu xüsusi rejimli xəstəxanaya aparırlar”.