Mübarək Ramazan ayının başa çatmasına sayılı günlər qalıb. Aprelin 10-11-də ölkəmizdə Ramazan bayramıdır. Bu müqəddəs ayın əsrlərdən gələn ayinlərinə görə, bayramdan öncəki axşam, bayram namazına qədər fitrə zəkatı çıxarılmalıdır. Dini mətnlərdə deyilir ki, fitrə zəkatı təkcə oruc tutanlar üçün deyil, hər kəs üçün vacibdir. 

Bəs fitrə-zəkat kimlərə verilməlidir?

Hacı Müseyib Əliyev İqtisadiyyat.az-a bildirib ki, fitrənin çıxarılması maddi durumu normal olan insanların boynunda vacibdir. 

O deyib ki, bayram axşamı şam namazına qədər evdən fitrə çıxarılmalı və ev əhlinin hər bir üzvünün adına bu məbləğ qoyulmalıdır:

"Hətta həmin gün evə qonaq gələrsə, onun da yükü ev sahibinin üzərinə düşür. Ona görə də ev yiyəsi gələn qonaqlara görə də müvafiq olaraq evdən fitrə çıxarmalıdır".

Müseyib Əliyev deyir ki, fitrə müxtəlif məbləğlərdə çıxarıla bilər. Ancaq çox vaxt bunun hesablanması buğda ilə tənzimlənir:

"Adambaşına 3 kiloqram buğda dəyərində fitrə verilir. Bəzən bunu arpa ilə də hesablayırlar. Tövsiyyə olunur ki, unla hesablansın. Gəlirləri çox olan insanlar olur ki, daha çox yardım etmək üçün xurma və kişmişlə hesablayırlar. Bir ailədə 4 nəfər varsa, 12 kiloqram kişmişin dəyərində fitrə verilir. Burada xəsislik etmək lazım deyil. Onsuz da, kasıb insanlar yararlanır. Qafqaz Müsəlmanlar İdarəsi adambaşına 10 manat verilməsini tövsiyyə edir. Bununla belə kimsə artıq məbləğdə fitrə verirsə, daha gözəl olar. Bayram axşamı çıxarılan fitrə növbəti gün bayram namazına qədər yaxınlıqdakı kasıb ailələrə çatdırılmaldır. Fitrə zəkatını ərzaq kimi verənlərə də rast gəlinir. Lakin pul şəklində verilməsi daha yaxşı olar ki, həmin vəsait ailəyə hansısa ehtiyacını qarşılamağa və ya uşaqların lazımlı ləvazimatlarını almaqda köməklik etsin".