ABŞ dövlət katibi Antoni Blinken və İordaniya kralı II Abdullah Əmmanda keçirilən danışıqlarda Qəzza zolağında və bütövlükdə Yaxın Şərqdə davamlı sülhün bərqərar edilməsi üçün diplomatik səyləri müzakirə ediblər.

İqtisadiyyat.az xəbər verir ki, bu barədə ABŞ Dövlət Departamentinin mətbuat xidmətinin rəhbəri Metyu Miller məlumat verib.

Miller qeyd edib ki, tərəflər İsrail üçün təhlükəsizlik zəmanəti çərçivəsində müstəqil Fələstin dövlətinin yaradılması yolu ilə sülhün əldə olunmasını da müzakirə ediblər. Danışıqların digər mövzusu girovların azad edilməsini təmin edəcək atəşkəsə nail olmaq səyləri olub.

Blinken vurğulayıb ki, ABŞ-nin nöqteyi-nəzərindən HƏMAS hərəkatı hazırda danışıqlar masasında olan atəşkəs təklifini qəbul etməlidir.

Dövlət katibi həmçinin İordaniya Kralına humanitar yardımın Qəzza zolağına, xüsusən də hava yolu ilə çatdırılmasını asanlaşdırdığına görə təşəkkür edib. Tərəflər İordaniyadan quru yollarla yardımın çatdırılmasını sürətləndirmək imkanlarını müzakirə ediblər.