"Bəzi rus şirkətləri çinli ticarət tərəfdaşları ilə ödənişlərin ləngiməsi ilə üzləşir, bununla da on milyardlarla yuan dəyərində sövdələşmələr naməlum qalır".
İqtisadiyyat.az xəbər verir ki, bunu məsələdən birbaşa xəbəri olan rus mənbələri "Reuters" agentliyinə bildiriblər.
Çin Rusiyanın ən böyük ticarət tərəfdaşıdır, Çinlə ticarət keçən il Rusiyanın xarici ticarətinin üçdə birini təşkil edib və Rusiyaya Qərbin sanksiyalarına qarşı durmağa kömək edən mallar, xüsusilə də mühüm sənaye avadanlıqları və istehlak malları tədarük edilib. Bu həm də Çinin güvəndiyi neft və qazdan tutmuş kənd təsərrüfatı məhsullarına qədər Rusiya ixracatı üçün gəlirli bazardır.
Rusiyanın aparıcı e-ticarət platformalarından birindəki mənbənin sözlərinə görə, ABŞ Xəzinədarlığı iyun ayında Rusiya ilə əməliyyatlara görə Çin və digər ölkələrin banklarına əlavə sanksiyalar tətbiq etməklə hədələdiyi zaman Çin bankları əməliyyatlara qarşı daha ehtiyatlı davranmağa başlayıblar.
"Həmin anda Çinə bütün transsərhəd ödənişlər dayandırıldı. Biz həll yolunu tapdıq, lakin bu, təxminən üç həftə çəkdi, bu çox uzun müddətdir və bu müddət ərzində ticarətin həcmi xeyli azalıb", - mənbə bildirib.
Mənbələrin "Reuters" agentliyinə verdiyi məlumata görə, bəzi Rusiya şirkətləri öz əməliyyatlarını həyata keçirmək və Çin banklarının tənzimləmə yoxlamalarından yan keçmək üçün üçüncü ölkələrdəki vasitəçi zəncirlərindən istifadə edirlər. Nəticədə, əməliyyatın emalı xərcləri əvvəllər sıfıra yaxın olduğu halda, əməliyyat dəyərinin 6%-nə qədər artır.