Mərkəzi Bankın məlumatına görə, Azərbaycanda problemli kreditlərin məbləğində artım müşahidə olunur. Belə ki, bu il iyun ayında vaxtı keçmiş kreditlərin ümumi kredit portfelində xüsusi çəkisi 2,3 % təşkil edib.
Mövzu ilə bağlı Azərbaycan Qiymətləndiricilər Cəmiyyətinin sədri, iqtisadçı Vüqar Oruc İqtisadiyyat.az-a açıqlamasında bildirib ki, problemli kreditlərin həcminin artması arzuolunan deyil və bunun qarşısını almaq üçün ciddi addımlar atılmalıdır:
"Ölkənin kommersiya bankları kredit siyasəti aparırsa, kreditlərin müəyyən hissəsinin problemli kredit siyahısında düşməsi gözləniləndir. Sadəcə bank sektoru və müvafiq strukturların üzərinə düşən öhdəlik bu cür halların daha az olmasına çalışmaqdır. Hər bir bankda risklərin müəyyən edilməsi üçün departamentlər fəaliyyət göstərir və aparılan təhlillərdən sonra kredit ayrılır. Eyni zamanda kredit ayrılması qiymətləndirmə şirkətlərinin iştirakı ilə baş verir. Problemli kreditlərin artmaması üçün daha ciddi araşdırmalar aparılmalı və qiymətləndirmə şirkətləri obyektivliyini qorumalıdır. Problemli kreditin qarşısını almaq üçün risklərin sığortalanması, hesablanması və təhlilinə ehtiyac var. Banklar beynəlxalq qiymətləndirmə standartlarına əməl edən peşəkar komandadan ibarət olan şirkətlərlə əməkdaşlığa üstünlük verməlidirlər. Bundan başqa, yeni qurum kimi Qiymətləndirmə Palatası yaradıla bilər. Onu da qeyd edim ki, son zamanlar qiymətləndirmə şirkətlərini sayı artsa da, bu vəziyyətə nəzarət olunmalıdır. Çünki bu artım sözügedən sektorda monopoliyaya yol aça bilər. ".
Gülşən Şərif
