Dövlət Gömrük Komitəsi (DGK) Birləşmiş Ərəb Əmirliklərinin Azərbaycanda bərpaolunan enerji sektorunda fəaliyyət göstərən “Masdar Azərbaycan Enerji” şirkətinə cərimə yazıb.
İqtisadiyyat.az xəbər verir ki, DGK cərimə protokolunu İnzibati Xətalar Məcəlləsinin 485.2-ci maddəsinə əsasən tərtib edib.
Daha sonra protokol baxılması üçün Nəsimi Rayon Məhkəməsinə göndərilib və iş hakim Anar İbadzadənin icraatına verilib.
Protokol tərtib olunan maddədə deyilir ki, qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə vəzifəli şəxslər min manat məbləğində, hüquqi şəxslər min beş yüz manat məbləğində cərimə edilir.
Xatırladaq ki, “Masdar” şirkəti Azərbaycanın bərpaolunan enerji sahəsində ilk xarici tərəfdaşıdır. Şirkət Azərbaycanda Qaradağ Günəş Elektrik Stansiyasını inşa edib. “Masdar” şirkəti Azərbaycanda 2025-ci ilədək 1 qiqavat gücündə günəş, 2026-cı ilədək quruda 1 qiqavat gücə malik külək, 2033-cü ilədək dənizdə 2 qiqavat gücə malik külək enerjisi və yaşıl hidrogen layihəsini reallaşdırmağı, habelə 2037-ci ilədək dənizdə günəş enerjisi, külək və dəniz küləyindən istifadənin daha da genişləndirilməsini planlaşdırır.