Türkiyənin Kahramanmaraş bölgəsində baş verən güclü zəlzələ nəticəsində dağılan binaların sayının artması istisna edilmir. Yüksək mərtəbəli göydələnlərin yerlə bir olması insanı vahimələndirməklə, psixoloji sarsıntılara salmaqla yanaşı əmlak bazarına da öz təsirini göstərəcək. 

İqtisadiyyat.az xəbər verir ki, mövzu ilə bağlı saytımıza danışan əmlak məsələləri üzrə ekspert Elnur Fərzəliyev deyir ki, nəinki Türkiyə, qonşu ölkələrdə də bina evlərinə tələbat azalacaq: 

“Zəlzələ təbii ki, binalarda olan mənzillərə tələbatı azaldacaq. Azərbaycanda da hündürmərtəbəli binaların zəlzələ zamanı təhlükəli olması ilə bağlı insanlarda fobiya yaranır. Lakin biz ümumi mənzərəyə nəzər salsaq, Türkiyə ilə Azərbaycanda vəziyyət tamamilə fərqlidir. Dağılan binalar onu göstərir ki, Türkiyənin tikinti sahəsində keyfiyyət olduqca aşağı səviyyədədir. Keyfiyyətin aşağı olması səbəbindən, bu qədər dağıntılar, tələfat meydana gəlib. 

Azərbaycanda bu sahədə vəziyyət tam fərqlidir. Türkiyə ilə müqayisədə Azərbaycanda tikintilərə nəzarət çox güclüdür. Tikintilərdə istifadə olunan materiallar normativlərə uyğun olduğuna görə, nə zamansa belə bir təbiət hadisəsi baş verdikdə fikrimcə Azərbaycanda o formada dağıntılar meydana gəlməz. Türkiyədəki dağıntıların əsas səbəbi onların tikintidə lazım olan materialları istifadə etməməsidir. Beton, armatur, karkas sisteminin düzgün qurulmaması səbəbindən binalar bu dərəcədə dağıldı”.

 

 

Ekspert əlavə edib ki, təbii fəlakət əmlak bazarına mənfi təsir göstərəcək və müəyyən mənada həyət evlərinə tələbatı artıracaq:

“Bunun qısamüddətli olacağını düşünürəm. Çünki Bakının mərkəz hissələrində olan həyət evləri hər kəs üçün əlçatan qiymətə deyil, kənar ərazilərdə isə əksər evlərdə çıxarışlar olmadığına görə bu sahəyə maraq azdır. 

Nəzərə almalıyıq ki, 2022-ci ildə satılan daşınmaz əmlakların təxminən 60%-dən yuxarı hissəsi kreditlə satılıb, bu zaman da mütləq şəkildə çıxarış tələb olunur. Bu proses əmlak bazarında qiymətlərin enməsinə də səbəb ola bilər. Düşünürəm ki, şişirdilmiş qiymətlər real bazar qiymətinə qədər enəcək”.

Cavidan Mirzəzadə / İqtisadiyyat.az