“Azərenerji” ASC-nin xalis mənfəəti kəskin azalıb.

İqtisadiyyat.az-ın qurumun hesabatına əsasən əldə etdiyi məlumata görə, ASC ötən ili 175,112 milyon manat xalis mənfəətlə başa vurub. Bu da əvvəlki illə müqayisədə ciddi şəkildə azalma deməkdir. Çünki “Azərenerji” 2022-ci ili 436,506 milyon manat xalis mənfəətlə başa vurmuşdu.

Bununla yanaşı, ASC-nin yığılmış zərəri azalaraq 1 994,391 milyon manata düşüb. 2022-ci ildə bu rəqəm 2 164,739 milyon manat təşkil edib..

Ötən il “Azərenerji”nin elektrik enerjisi satışından gəlirləri azalaraq 1 685,264 milyon manata (əvvəlki il 1 840,564 milyon manat), elektrik şəbəkəsinə qoşulma xidmətlərindən və digər satış gəlirləri iki dəfədən çox azalaraq 3,024 milyon manata (əvvəlki il 6,987 milyon manat), digər gəlirləri azalaraq 3,741 milyon manata (əvvəlki il 4,128 milyon manat) düşüb.

Eyni zamanda, hesabat dövründə qurumun mənfəət vergisi xərcləri azalaraq 61,332 milyon manata (əvvəlki il 98,432 milyon manat) düşüb. Digər vergi ödəmələri azalaraq 26,902 milyon manat (əvvəlki il 33,086 milyon manat) təşkil edib. Xarici valyuta mübadiləsindən gəlirləri azalaraq 160,351 milyon manata (əvvəlki il 204,401 milyon manat) düşüb, xarici valyuta mübadiləsindən zərəri isə artaraq 144,521 milyon manata (əvvəlki il 98,944 milyon manat) çatıb.

“Azərenerji”nin yanacaq xərcləri artaraq 809,242 milyon manata (əvvəlki il 806,424 milyon manat), köhnəlmə və amortizasiya xərcləri 278,518 milyon manata (əvvəlki il 272,532 milyon manat), işçi heyəti ilə bağlı xərcləri artaraq 104,810 milyon manata (əvvəlki il 79,777 milyon manat), təmir və texniki xidmət xərcləri iki dəfəyə yaxın artaraq 120,131 milyon manata (əvvəlki il 70,569 milyon manat), xammal və material ehtiyatları xərcləri artaraq 21,414 milyon manata (əvvəlki il 18,891 milyon manat), digər xərcləri artaraq 69,700 milyon manata (əvvəlki il 61,876 milyon manat) çatıb.

Bu il yanvarın 1-nə “Azərenerji”nin aktivləri 5 313,872 milyon manat olub (əvvəlki il 4 522,509 milyon manat). Hesabat dövründə səhmdar cəmiyyətinin öhdəlikləri artaraq 2 531,327 milyon manata (əvvəlki il  2 212,996 milyon manat) çatıb.

Xatırladaq ki, "Azərenerji" 1997-ci ildə yaradılıb. Onun nizamnamə kapitalı 1 760 494 580 manatdır. 100% dövlətə məxsus qurum ölkənin əsas enerji istehsalçısı və ixracatçısıdır.