“Azərbaycanda tarif şurasının dərman qiymətlərinin tənzimlənməsi metodundan öncə 200-ə yaxın dərman şirkəti fəaliyyət  göstərir. Onların da ciddi bir rəqabəti var idi. Eyni molekuldan olan dərmanları ölkəyə gətirərkən bir-birindən daha ucuz satmağa çalışırdılar. Müəyyən rəqabət yaranırdı”.

Bu fikirləri İqtisadiyyat.az saytına bildirən iqtisadçı-ekspert Natiq Cəfərli deyir ki, tarif şurasının tənzimlənmə mexanizmi kökündən yanlışdır.

“Onlar molekula görə, istehsalçı ölkəyə görə qiymət tənzimlənməsi siyasətinə keçdilər. Nəticə etibarı ilə nə baş verdi? – İri şirkətlər ayaqda qaldı, kiçik şirkətlər isə bazardan sıxışdırılıb, çıxarıldı. İndi təqribət 26 şirkət işləyir, hansı ki, bunların sayı 200-dən çox idi. Bu da inhisarçılıq meyillərini artırır. İri şirkətlərin əlində kifayət qədər resurslar var ki, ölkəyə daha ucuz və molekul qaydalarına uyğun olan ölkələrdən  dərman gətirib, daha baha satsınlar. Bizdə tənzimlənmə mexanizmi budur ki, istehsalçı ölkənin də təsiri var. Bunlar Şri-Lankadan, Hindistandan, Nepaldan yəni, molekulları eyni olan, amma, istehsalçı olaraq daha keyfiyyətsiz və daha az təsir edən dərmanların gətirilməsində maraqlıdırlar”.

Natiq Cəfərli deyir ki, inhisarçılıq meylləri dərman bazarında daim qiymət artımına səbəb oldu və bu tendensiya təəssüf ki, indi də davam edir. Bu səbəbdən də bahalaşma ilə bağlı davamlı etirazlar olur:

“Deyirlər ki, eyni dərmanlar Türkiyədə, Rusiyada və bir sıra ölkələrdə 10 dəfə daha ucuz satılır. Bu birbaşa inhisarçılığın təzahürüdür. Rəqabətli mühit yaranmasa, tarif şurasının məntiqsiz yanaşması aradan qaldırılmasa təəssüf ki, qiymət artımlarını davamlı görəcəyik”.