"Anafilaktik şok keçirən insanı xilas etmək çox çətindir".
Bunu İqtisadiyyat.az-a tibbi ekspert Rasif Bağırov deyib.
Həkim şok hadisəsinin yaranmasına səbəb olan amillərdən danışıb.
Onun sözlərinə görə, şokun yaranması zamanı orqanizmə hansısa yad cisim daxil olur. Bu yad cismə qarşı orqanizm tərəfindən antitel adlanan xüsusi maddələr yaranır. İnsan orqanizmində immun sistemi lazımi səviyyədə olmadıqda antitel yad cisimlə qarşılıqlı təsirə girəndə şok prosesi inkişaf etməyə başlayır:
"Elə şok hadisəsi var ki, ildırım sürəti ilə baş verir. Buna anafilaktik şok deyilir. Anafilaktik şok keçirən insanı xilas etmək çox çətindir. Demək olar ki, dünyada baş verən şokların 10 faizi anafilaktik şokun payına düşür. Hansı ki, bu zaman xəstəni vəziyyətdən çıxarmaq olmur və təxminən 5-10 dəqiqə ərzində xəstə vəfat edir".
R.Bağırov vurğulayıb ki, çox da sürətlə baş verməyən şok hadisəsi də var. Bu zaman immun sistemi tamamilə sıradan çıxmır, xəstə şoka düşmür. Sadəcə olaraq özündən gedir. Orqanizmin özü bu xəstəni özünə gətirə bilir.
Gülşən Şərif
