ABŞ prezidentinin milli təhlükəsizlik üzrə köməkçisi Ceyk Sallivan və Çinin xarici işlər naziri Vanq Yi yaxın günlərdə Cənub-Şərqi Asiya ölkələrindən birində görüşəcəklər.
İqtisadiyyat.az xəbər verir ki, bu barədə "Financial Times" (FT) mənbələrinə istinadən məlumat yayıb.
Məqalədə qeyd edilir ki, Sullivan və Vanq Yi 2023-cü ildə Vyana və Maltada iki dəfə gizli şəkildə əlaqə saxlayıblar ki, bu da noyabrda ABŞ prezidenti Co Bayden və Çin prezidenti Si Tsinpin arasında görüş təşkil etmək üçün əsas olub. Qəzet anonim amerikalı rəsmilərə istinadən yazır ki, medianın iştirakı olmadan belə özəl ünsiyyət formatı Vaşinqtonla Pekin arasında yığılıb qalmış məsələlərin müzakirəsi üçün daha effektivdir.
Ağ Ev qarşıdan gələn görüşlə bağlı qəzetə şərh verməkdən imtina edib və Çinin Vaşinqtondakı səfirliyi şərh sorğusuna cavab verməyib.
