"Ukrayna münaqişəsi zamanı kaset bombalarının tədarükü və istifadəsi BMT-ni ciddi narahat edir və onların istifadəsi dərhal dayandırılmalıdır".
İqtisadiyyat.az xəbər verir ki, bunu BMT Təhlükəsizlik Şurasının Rusiya tərəfindən çağırılan Ukrayna üzrə iclasında çıxışı zamanı tərksilah məsələləri üzrə ali nümayəndənin müavini Adedeji Ebo deyib.
"Münaqişə boyu kaset sursatlarının tədarükü və istifadəsi ilə bağlı hesabatlar son dərəcə narahatlıq doğurur. BMT-nin Baş katibi Antonio Quterreş dəfələrlə kaset sursatlarının istifadəsinə dərhal son qoymağa çağırıb. Bu silahlar çoxdan ləğv edilməli və təhvil verilməli idi", - diplomat bildirib.
"Ukrayna Silahlı Qüvvələrinə hərbi yardımın tədarükü, silah və sursatların təhvil verilməsi davam edir. Mövcud məlumata görə, bu tədarüklərə ağır silahlar, o cümlədən döyüş tankları, zirehli texnika, təyyarələr, helikopterlər, iriçaplı artilleriya sistemləri, raket sistemləri daxil edilib. Silahların tədarükü beynəlxalq hüquqa uyğun olaraq, o cümlədən BMT Təhlükəsizlik Şurasının qətnamələrinə uyğun olaraq həyata keçirilməlidir", - Ebo əlavə edib.
