2000-ci illərin əvvəllərində dünyada vaksinasiya əleyhinə kampaniyalar başlasa da, Azərbaycana o qədər təsir eləmirdi. COVID-19 pandemiyası zamanı tətbiq edilən karantin dövründə şayiələr, nəzəriyyələr daha geniş vüsət aldı. Bu da peyvəndlərə qarşı qorxulara səbəb oldu. Hazırda da dünyada tamamilə əsasız olaraq vaksinasiya əleyhinə çox güclü kampaniyalar gedir. Bu da Azərbaycan əhalisinə təsirsiz ötüşmür.

İqtisadiyyat.az xəbər verir ki, bunu AZƏRTAC-a müsahibəsində Səhiyyə Nazirliyinin mütəxəssis-eksperti, epidemioloq Nigar Mütəlibova deyib.

Onun sözlərinə görə, pandemiya zamanı tətbiq edilən karantin dövründə məhdudiyyətlər səbəbindən uşaqlar peyvənddən kənarda qalırdı. Ondan sonra uşaqlar peyvəndə cəlb olunsalar da vaksinlər barədə yayılan dezinformasiyalar nəticəsində bəzi valideynlər övladlarını peyvənd etdirməkdən könüllü imtina edirdilər: “Ümumiyyətlə, əhali arasında infeksion xəstəliklərə qarşı immunoloji təbəqə deyilən bir anlayış var. Qızılca xəstəliyinə qarşı uşaq əhalisi arasında immun təbəqə yaranmalıdır. Həmin təbəqə 95 faizdən yuxarı olmayanda əhali immunitetini qazanmamış hesab olunuruq. Xəstəlik isti yay aylarında sürətlə yayılmadı. Payızda uşaqların sıx yığışdığı məkanlarda sürətlə yoluxmalar qeydı alındı. Qızılca infeksiyası digərlərindən ən yüksək yoluxmaya malikdir. Məsələn, hər 10 immuniteti olmayan şəxs bir xəstə ilə təmasda olanda ehtimal var ki, onlardan 9-u xəstələnəcək. Yəni yoluxma göstəricisi 90 faizdir. Həmin göstərici qripdə 60, COVID-də 40-50 faizdir. Sevindiricidir ki, valideynlərin peyvəndə qarşı münasibəti yaxşıya doğru dəyişilir və onlar peyvəndə daha çox müraciət edirlər. Vəziyyətin epidemioloji cəhətdən stabilləşməsini görürük. Nə qədər çox uşaq əhalisi vaksinasiya olunacaqsa, biz o qədər tez bu infeksiyaya son qoyacağıq”