Ekologiya və Təbii Sərvətlər Nazirliyinin nəzdində fəaliyyət göstərən “Tullantıların İdarəedilməsi Mərkəzi” MMC-də təhlükəli tibbi tullantıların zərərsizləşdirilməsi prosesi izlənilib.
İqtisadiyyat.az xəbər verir ki, Mərkəzdə partlayıcı və radioaktiv maddələr istisna olmaqla qazma şlamı, çirklənmiş torpaqlar, istifadə müddəti bitmiş qida məhsulları, tibbi tullantılar və digər bu tipli tullantılar qəbul edilərək zərərsizləşdirilir.
Poliqonda 20-dən çox işçi çalışır. Ümumi proses isə tullantıların mərkəzə daxil olmasından başlayır.
Mərkəzin Sağlamlıq, Əməyin Təhlükəsizliyi və Ətraf Mühitin Mühafizəsi (SƏTƏM) üzrə mühəndisi Əvəz Hüseynov bildirib ki, tibbi tullantıların idarə edilməsində üç mərhələ var: "Öncəliklə, tibbi tullantılar tibb müəssisələrində germetik paketlərdə toplandıqdan sonra nəqliyyat vasitəsilə xüsusi fərdi mühafizə vasitələrindən istifadə olunmaqla poliqona gətirilir. Sonra tullantılar insenatora (yanma sobası) boşaldılır. İnsenatorun saatda yandırma gücü 3 kubmetrə yaxındır. Sobada 800-1200 dərəcədə tibbi tullantıları yandırılır".
Onun sözlərinə görə, tullantılar sobanın birinci kamerasında 800 dərəcədə yandırılır. Əmələ gələn zəhərli qazlar 1200 dərəcədə ikinci kamerada təkrar yandırılır: "Tullantıların tərkibindəki zəhərli qazlar minimuma endirilir və atmosferə buraxılır. Ardınca nəqliyyat vasitəsi dezinfeksiya olunur və çıxışa buraxılır".
Ə.Hüseynov vurğulayıb ki, gün ərzində qəbul edilən tibbi tullantıların külü günün sonunda paketlənərək geomembran və geotekstil materiallarla tam izolyasiya olunmuş hücrələrdə basdırma üsulu ilə zərərsizləşdirilir. Gün ərzində təqribən 20-25 kubmetr tibbi tullantı zərərsizləşdirilir.
