Qızıl uzun müddətdir sərvət anbarı sayılır və çətin dövrlərdə investorlar üçün təhlükəsiz sığınacaq hesab olunur.

İqtisadiyyat.az "investing.news"a istinadən xəbər verir ki, iqtisadi və sosial-siyasi qeyri-müəyyənliklər qiymətli metalın dəyərini rekord həddə çatdırıb.

Dünyada qızıl necə ticarət olunur?

Qızılın külçəsi bir unsiya üçün dollar və sentlə ticarət edilir, aktivlik dünya üzrə bütün saatlarda baş verir və nəticədə metal üçün canlı qiymət yaranır. İnvestorlar Nyu-York, London, Tokio və Honq Konq kimi əsas əmtəə bazarlarında qızıl ticarəti aparırlar.

London qiymətli metalların, o cümlədən gümüşün ticarətinin mərkəzi hesab olunur. Nyu-York Ticarət Birjasının COMEX bölməsi ən çox kağız ticarətinə ev sahibliyi edir. Dünyanın bəzi yerlərində, məsələn, Hindistanda zərgərlik şəklində qızıl almaq bu metala investisiya üçün ən böyük və ənənəvi yoldur.

Qızıl sərmayəsinin digər bir yolu isə qızıl fyuçers bazarı vasitəsilə həyata keçirilən kağız ticarətidir. İştirakçılar qızılın gələcəkdə razılaşdırılmış qiymətə çatdırılması üçün qızıl fyuçers müqavilələri bağlayırlar.

Bəs indiyə qədər qızılın ən yüksək qiyməti nə qədər olub?

Qızılın qiyməti cari ilin mayın 20-də tarixin ən yüksək səviyyəsinə - 2 450,05 ABŞ dollarına çatıb. Araşdırmalara görə, qızıl son on ildə həm zirvələrdə, həm də enişlərdə öz yerini tutub. 2014-cü ildən 2019-cu ilin əvvəlinə qədər 1,100 ABŞ dolları ilə 1,300 ABŞ dolları arasında sabit qaldıqdan sonra qızıl 2019-cu ilin ikinci yarısında 1,500 ABŞ dollarını ötüb. Buna səbəb isə ABŞ dollarının zəifləməsi, artan geosiyasi problemlər və iqtisadi artımın yavaşlaması olub.

Qeyd olunur ki, Çin və Hindistan qızılın ən böyük alıcılarıdır və dünyanın ən böyük qızıl istehlakçısı adı uğrunda mübarizə aparırlar. Amerika Birləşmiş Ştatları Geoloji Tədqiqat Xidmətinin (USGS) məlumatına görə, ötən il ən çox qızıl hasil edən ölkə 370 ton ilə Çin olub.

Gözəl Həşimova