Bu ilin birinci rübündə qlobal borclar rekord səviyyəyə - 315 trilyon dollara çatıb.

İqtisadiyyat.az xəbər verir ki, bu barədə Beynəlxalq Maliyyə İnstitutunun (IIF) “Qlobal Borc Monitoru” hesabatında deyilir.

Hesabata görə, bu ilin birinci rübündə qlobal borcun məbləği 1,3 trilyon dollar artaraq 315 trilyon dollara çatıb. Halbuki, ötən ilin eyni dövründə qlobal borc 307 trilyon dollar olaraq hesablanıb.

Ardıcıl 2 rüb ərzində qlobal borcun artması əsasən inkişaf etməkdə olan bazarların hesabına baş verib. Sözügedən dövrdə inkişaf etməkdə olan ölkələrdə borc yığımının böyük hissəsi Çin, Hindistan və Meksikada cəmləşib.

İnkişaf etmiş iqtisadiyyatlarda borc məbləğinin ümumi artımı ilk növbədə ABŞ və Yaponiyada, daha sonra İrlandiya və Kanadada cəmləşib. Borc məbləğində ən ciddi azalmalar İsveçrə və Almaniyada müşahidə olunub.

İlin birinci rübündə inkişaf etmiş iqtisadiyyatların ümumi borcu 209,7 trilyon dollar olaraq hesablandığı halda, inkişaf etməkdə olan ölkələrin borcu 105,4 trilyon dollar olaraq qeydə alınıb.

Qlobal borcların bölgüsünə nəzər salsaq, cari ilin birinci rübündə ev təsərrüfatlarının borcları 59,1 trilyon dollara, qeyri-maliyyə şirkətlərinin borcları 94,1 trilyon dollara, dövlət borcları 91,4 trilyon dollara, banklar kimi maliyyə şirkətlərinin borcları 70,4 trilyon dollara yüksəlib.

Qlobal borcun ümumi daxili məhsula (ÜDM) nisbəti üç rüb ardıcıl olaraq azaldıqdan sonra bu ilin birinci rübündə yüksəlişini davam etdirib.

İlin birinci rübündə qlobal borcun ölkələrin ümumi daxili məhsula (ÜDM) nisbəti 333% təşkil edib.

Gözəl Həşimova