Son günlər qızılca xəstəliyinə yoluxma hallarının artması müvafiq qurumları hərəkətə gətirib. Bu fonda Səhiyyə Nazirliyi ölkə ərazisində orta və yaşlı əhalinin vaksinasiyası üçün peyvəndin (Qızılca-Parotit-Məxmərək) tətbiq olunacağını açıqlayıb.
Mövzu ilə bağlı həkim-terapevt, tibbi ekspert Rasif Bağırov İqtisadiyyat.az-a açıqlamasında bildirib ki, bu il Azərbaycanla yanaşı, dünyanın bir çox ölkələrində qızılca sürətlə yayılıb.
Onun sözlərinə görə, bu ilin əvvəlindən başlayaraq Avropa regionunda, həmçinin qonşu ölkələr olan Türkiyə, Rusiya, İran, Qazaxıstan və Gürcüstanda qızılca xəstəliyinin yayılması müşahidə olunur: "Ümumilikdə, qonşu ölkələrdə qızılcanın artım səviyyəsi ilə bağlı dəqiq informasiya mövcud deyil. Çünki xarici mənbələrdə bu haqda məlumat verilmir. Ümumdünya Səhiyyə Təşkilatının ölkəmizlə bağlı qərarını isə təkzib etmək olmaz. Təşkilat ölkələr üzrə araşdırma apararaq yekun qərar verir".
Həkim bildirib ki, peyvəndin zərərləri ilə bağlı məlumatlar yayılsa da, bu, doğru deyil. Çünki yoluxucu və ağır xəstəliklərin qarşısını yalnız peyvənd vasitəsilə almaq mümkündür: "İndiki məqamda Səhiyyə Nazirliyinin vaksinasiya ilə bağlı qərarı doğru addımdır. Qızılcanın kütləvi şəkildə yayılması müşahidə olunursa, deməli, vətəndaşlara peyvənd vurulmalıdır. Peyvənd xəstəliklərdən qorunmaq üçün ən yaxşı yoldur".
Milli Məclisin deputatı Elman Nəsirov isə İqtisadiyyat.az-a açıqlamasında peyvəndlə bağlı cəmiyyətdə formalaşmış fikirlərə münasibət bildirib. O, vətəndaşlara çağırış edərək peyvənd olunmağın vacibliyini və peşəkar həkimlərin tövsiyələrinə əməl etməyin əhəmiyyətini vurğulayıb.
Deputat pandemiyanın ən qızğın, minlərlə insanın həyatına son qoyduğu dövrdə də insanların əksəriyyətinin əks yolu seçdiyini xatırladıb: "Hətta saxta vaksinasiya ilə bağlı müəyyən cinayət faktları da ortaya çıxmışdı. Belə ki, vətəndaş müəyyən razılaşma qarşılığında həkimlə sövdələşməyə girərək peyvəndlənmədən kənarda qalmağı seçirdi. Əgər peyvənd təhlükəli olsaydı, inkişaf etmiş və varlı ölkələr peyvənd almaqdan imtina edərdilər. Halbuki epidemiya vaxtı vaksini ən çox alan məhz sözügedən ölkələr olmuşdu. Bu baxımdan peyvəndlə bağlı formalaşmış yanlış fikirlər aradan qaldırılmalıdır. Hər halda söhbət peşəkarların çağırışından gedir".
E.Nəsirov qızılca xəstəliyinin uşaqlar arasında daha çox yayılması fonunda problemə ciddi yanaşmağın əhəmiyyətini dilə gətirib: "Bu məsələdə valideynlərin daha çox diqqətli olması ilə bağlı çağırışlara sıx rast gəlinir. Səhiyyə Nazirliyinin orta və yaşlı əhaliyə çağırışı da nəzərdən qaçmır. Xəstəliklərdən və təhlükəli hallardan hifz olunmaq üçün vaksinasiya prosesində iştirak etmək lazımdır. Bu addım təkcə özümüzü deyil, yaxınlarımızı da qorumaq üçün atılmalıdır. Təbii ki, vaksinasiya prosesi könüllüdür. Lakin yaxşı olardı ki, hər kəs nazirliyin çağırışına əməl etsin".
Gülşən Şərif
