"Mühasibat uçotu haqqında Azərbaycan Respublikası qanununun tələblərinə əsasən hazırda respublikamızda təxminən 3 minə yaxın şəxs tərəfindən peşəkar mühasib sertifikatı əldə edilmişdir. Mühasibat uçotu haqqında qanunun tələblərinə əsasən peşəkar mühasib sertifikatı əldə etmiş şəxs eyni zamanda keçirilən mühasib təşkilatlarından birinin üzvü olduğu halda peşəkar mühasib hesab edilir".

İqtisadiyyat.az xəbər verir ki, bunu Azərbaycan Respublikası Maliyyə Nazirliyinin Uçot siyasəti şöbəsinin müdiri Firuzə Abdullayeva "Vergi və Mühasibatlıq Zirvəsi 2024" tədbirində çıxışı zamanı deyib.

"Belə tədbirlərin keçirilməsi mühasibat uçotu sahəsində mövcud olan formativ-texniki bazanın təkmilləşdirilməsi ilə bağlı təkliflərin verilməsinə böyük bir zəmin yaradır. Məlum olduğu kimi son dövrlərdə mühasibat uçotu sahəsində aparılan islahatlar bu sahənin daha da inkişaf etməsi ilə nəticələnmişdir. Belə ki, mühasibat uçotu haqqında Azərbaycan Respublikası qanununun tələblərinə əsasən hazırda respublikamızda təxminən 3 minə yaxın şəxs tərəfindən peşəkar mühasib sertifikatı əldə edilmişdir. Mühasibat uçotu haqqında qanunun tələblərinə əsasən peşəkar mühasib sertifikatı əldə etmiş şəxs eyni zamanda keçirilən mühasib təşkilatlarından birinin üzvü olduğu halda peşəkar mühasib hesab edilir. Bu gün ölkəmizdə maliyyə nazirliyi tərəfindən akkreditasiya olunmuş 4 peşəkar mühasib təşkilatı fəaliyyət göstərir. Mühasiblərin peşəkarlıq səviyyəsinin artırılması, müəssisənin gələcək inkişaf perspektivlərinin müəyyən edilməsi, təşkilatın kapital, gəlir və xərclərinin düzgün uçotunun aparılması əməkhaqlarının, vergilərin düzgün hesablanması, ödənişlərin vaxtında həyata keçirilməsi ilə nəticələnməklə müəssisənin iqtisadi səmərəsinin artırılmasına gətirib çıxarır. Mühasibat işi böyük bilik və geniş dünyagörüşü tələb edir. Bu gün mühasib müəssisənin fəaliyyətini qanun çərçivəsində planlaşdırmalı, müsbət maliyyə nəticəsi əldə etmək üçün öz işinə yaradıcı yanaşmalıdır. Mühasib peşəsinin müsbət tərəfləri çoxdur. Müasir mühasib qanunvericilikdəki bütün dəyişikliklərdən daim xəbərdar olmalı, əməliyyatları düzgün və qüsursuz görməli, müasir texnologiyalarla, proqram təminatları ilə işləməyi bacarmalıdır. 

Bundan başqa mühasibat uçotu haqqında Azərbaycan Respublikası qanununa aparılmış son dəyişikliklərə əsasən iri və orta sahibkarlıq subyektləri və publik hüquqi şəxslər mühasibat uçotunu elektron formada aparmalıdırlar. Bu tələb mühasibat uçotu sahəsinə süni intellektin tətbiqi ilə beynəlxalq standartlar əsasında mühasibat uçotunun daha dəqiq aparılmasına, nəticədə maliyyə savadlarının, vergi bəyannamələrinin və digər hesabatların əldə edilməsi və təqdim edilməsinə səbəb olacaqdır. Mühasibat uçotu sahəsində qanunvericiliyin təkmilləşdirilməsi üzrə işlər daim davam etdirilir. Bu məqsədlə təkcə mühasibat uçotu sahəsində deyil, eyni zamanda mühasibat uçotu ilə əlaqəli qanunvericilik aktlarının təkmilləşdirilməsi qarşımızda duran vacib məsələlərdən biridir", - deyə F.Abdullayeva bildirib.