Ermənistan 2024-cü ildə KTMT-nin fəaliyyətinin maliyyələşdirilməsində iştirak etməyəcək. 

İqtisadiyyat.az xəbər verir ki, bu barədə Factor.am agentliyinə Respublika Xarici İşlər Nazirliyinin mətbuat katibi Ani Badalyan məlumat verib. 

"Ermənistan Respublikası KTMT-nin Kollektiv Təhlükəsizlik Şurasının "2024-cü il üçün KTMT-nin büdcəsi haqqında" 23 noyabr 2023-cü il tarixli qərarına qoşulmaqdan və təşkilatın nəzərdə tutduğu fəaliyyətinin maliyyələşdirilməsində iştirakdan çəkinəcək, eyni zamanda qəbul edilməsinə etiraz etməyəcək", - Badalyan bildirib. 

Bundan əvvəl Ermənistanın baş naziri Nikol Paşinyan bəyan etmişdi ki, KTMT-yə etibar etmək olmaz. Son vaxtlar İrəvan bəzi inteqrasiya formatlarında görüşləri dəfələrlə buraxıb. O cümlədən, Paşinyan 2023-cü ildə Minskdə keçirilən KTMT sammitində iştirak etməyib, həmçinin respublikanın bu təşkilatda iştirakını dayandırdığını bəyan edib.