ABŞ-də aparılan yeni bir araşdırma Çindəki ölüm hallarının sürətlə artdığını göstərir.

İqtisadiyyat.az xəbər verir ki, söhbət koronavirus pandemiyası ilə bağlı tətbiq olunan karantin rejiminin ləğvindən sonrakı dönəmdən gedir. Belə ki, sərt karantin qaydalarının ləğvindən sonrakı iki ay ərzində Çində təxminən 2 milyondan artıq ölüm faktı qeydə alınıb. 

Bu, "Fred Hutchinson" Xərçəng Mərkəzinin araşdırmasıdır və bilgilər Çindəki bəzi universitetlər tərəfindən dərc edilən ölüm məlumatlarından və internet axtarışlarından götürülüb.

Araşdırmada qeyd olunur ki, 2022-ci ilin dekabrından 2023-cü ilin yanvarına qədər 30 yaşdan yuxarı insanlar arasında baş verən bütün səbəblərdən təqribən 1,87 milyondan artıq ölüm faktı qeydə alınıb. Bunun Çinin üç ildir tətbiq etdiyi sərt karantin qadağalarını aradan qaldırmasından sonra baş verdiyi bildirilir. Məlumata görə, karantin qadağaları ləğv edildikdə sonra Çində xəstəxanaya yerləşdirmə və ölüm halları kütləvi şəkildə artıb. 

Bəzi mənbələrin yazdığına görə, Çin hökumətinin dekabr ayında karantin rejimini dayandırmasından sonrakı bir ay ərzində sözügedən virusa yoluxmuş təxminən 60,000 insan xəstəxanalarda həyatını itirib. 

Çinin Milli Səhiyyə Komissiyası sözügedən hesabatla bağlı şərh bildirməyib. 

Qlobal səhiyyə mütəxəssisləri dəfələrlə Çin hökumətini xəstəxanaya yerləşdirmə və ölüm halları ilə bağlı məlumatları şəffaf şəkildə açıqlamağa dəvət edir.

Qeyd edək ki, Çin 2022-ci ilin sonunda rəsmi gündəlik ölüm nəticələri barədə məlumat verməyi dayandırıb. Ümumdünya Səhiyyə Təşkilatının məlumatına görə, Çində COVID-19-dan həyatını itirənlərin sayı 121,628 nəfər olub. Dünya üzrə bu virusdan ölənlərin sayı isə 7 milyona çatır.

Fevral ayında Çin liderləri COVID üzərində "həlledici qələbə"ni elan etdilər. Lakin virus hələ də ölkədə yayılmaqdadır. Pekinin səhiyyə rəsmilərinin fikrincə, COVID-19 hələ də paytaxtda bir nömrəli yoluxucu xəstəlik hesab oluna bilər. Əsas dominant variant isə EG.5 (Eris) adlı yeni Omicron ştammıdır.

Ölkənin Milli Xəstəliklərə Nəzarət və Qarşısının Alınması Bürosundan bildirilib ki, "Eris"ə yoluxma nisbəti apreldə 0,6%-dən avqustda 71,6%-ə yüksəlib və Çinin əksər əyalətlərində dominant ştamm olaraq qalır.