"Azərbaycan, Türkiyə və Rusiyanın mövqeyi bir-birinə çox yaxındır".

Bu sözləri Türkiyə Prezidenti Rəcəb Tayyib Ərdoğanın Türkiyə, Azərbaycan, Rusiya və Ermənistan liderlərinin dördtərəfli görüşü ilə bağlı təklifini dəyərləndirən Beynəlxalq Münasibətlər və Diplomatiya Araşdırmaları Mərkəzinin eksperti Kənan Novruzov İqtisadiyyat.az-a açıqlamasında deyib.

Onun sözlərinə görə, dördtərəfli görüşün baş tutması milli maraqlarımıza uyğundur:

"Mövcud vəziyyətdə regionda qəribə proseslər baş verir. Rusiya başa düşür ki, Qərb regiona girməyə çalışır. Qərbin bu istəyini Rusiya da başa düşür və hər iki ölkə Qərbin regionda mövcud olmasını istəmir. Rusiya regionda gərginliyin olmasında maraqlı olduğu üçün sülh müqaviləsini istəmir. Lakin Qərbin sülh müqaviləsi adı ilə regiona girməyə başladığını da görür. Ona görə də son vaxtlar rəsmi Moskva proseslərə loyal yanaşır və sülh müqaviləsini məqsədli şəkildə dəstəkləyir. Rusiya Azərbaycanın keçirdiyi antiterror tədbirlərini dəstəklədi. Çünki Rusiyada regionda boşluğun olmasını istəmir. Bu halda Qərb regiona daxil ola bilməyəcək. Bu məsələdə Türkiyə ilə Rusiyanın məqsədləri eynidir. Diqqət edirsinizsə, Azərbaycanın antiterror tədbirləri Türkiyə Prezidenti Rəcəb Tayyib Ərdoğanın Rusiya səfərindən sonra keçirildi. Bu məsələnin Putin-Ərdoğan görüşündə müzakirə olunması istisna olunmur. 

Dördtərəfli görüşə gəlincə, bu, hər kəsə sərf edir. Çünki avtomatik olaraq regional məsələlər region ölkələri tərəfindən həll olunacaq. Ermənistan münasibətlərdə də yumşalma hiss olunur. Dördtərəfli görüş  baş tutarsa, hər ölkə öz mövqeyindən çıxış edəcək. Bütün hallarda Azərbaycan, Türkiyə və Rusiyanın mövqeyi bir-birinə çox yaxındır. Ermənistanı isə başa salmaq lazımdır ki, Qərbin çaldığı havanı oynamaqla heç nə qazana bilməyəcək. Dördtərəfli görüşün baş tutması fonunda çox ciddi razılıqlar əldə olunacaq. Belə ki, görüşdən sonra Zəngəzur dəhlizi və regional kommunikasiyalar açıla bilər. Eyni zamanda sülh müqaviləsi imzalana bilər. Bu görüş həm də Paşinyanın mövqeyinin müəyyənləşməsinə təkan verəcək. Paşinyan hansı tərəfdə oynaması ilə bağlı qərar verməlidir". 

Gülşən Şərif