Yay mövsümü ilə əlaqədar bağ evlərinin qiymətində artım müşahidə olunur. Artım ölkə üzrə bağ evlərinin həm kirayə, həm də satışı qiymətlərində özünü göstərir. Ekspertlər isə bahalaşmanın yay aylarında bağ evlərinə tələbatın artması ilə əlaqədar olduğunu söyləyirlər.

Əmlak məsələləri üzrə ekspert Elnur Fərzəliyev İqtisadiyyat.az-a açıqlamasında deyib ki, bağ evlərinə tələbat 80 faiz hallarda mövsümi xarakter daşıyır.

Onun sözlərinə görə, iyundan başlayaraq avqustun sonuna qədər bağ evlərinə tələbat artır: "Bu, onların həm satışı, həm də kirayəsinə aiddir. Bağ evlərinin kirayələri həm aylıq, həm də günlük olur. Əvvəlki illərdə, yəni 2020-ci ilə qədər Abşeronda və paytaxtın dənizkənarı ərazilərindəki bağ evlərinə tələbat daha çox idi. Amma son dörd ildə isə insanlarda Azərbaycanın turistik bölgələrinə daha çox maraq yaranmağa başlayıb. Çünki 2020-ci ildə pandemiya səbəbindən sərhədlərin bağlı olması insanları yay aylarında istirahətə xarici ölkələrə deyil, Azərbaycanın turistik bölgələrinə üz tutmalarına gətirib çıxardı. Bu da təbii olaraq daxili turizmin inkişafına təkan vermiş oldu".

Ekspert bildirib ki, artıq son 4 ildə bölgələrdə xüsusən də yay aylarında turizm əvvəlki illərə nisbətən daha sürətlə inkişaf edib və bağ evlərinin kirayə qiymətləri, demək olar ki, paytaxt Bakı ilə eyniləşib: "Söhbət təkcə onların kirayə qiymətlərindən getmir, həmçinin artıq bağ evi almaq istəyənlərin bir hissəsi Bakının dənizkənarı ərazilərinə deyil, Azərbaycanın turistik zonalarına üstünlük verirlər. Buna görə də həmin ərazilərdə torpaqlara da tələbat artır".

E.Fərzəliyev Bakı və bölgələr üzrə bağ evlərinin kirayə qiymətlərindən də danışıb. O bildirib ki, bölgələrdə bağ evlərinin gündəlik kirayə qiyməti 50 manatdan başlayır və təxminən 300-400 manata qədər dəyişə bilir: "Bakıda isə bağ evlərinin günlük qiyməti 50 manatdan bir neçə min manata qədər dəyişir. Bakıda insanlar daha çox dənizə ən yaxın məsafədən bağ evlərini kirayələyirlər. Amma nəzərə almaq lazımdır ki, dəniz hər yerdə açıq deyil, çox yerdə bağlıdır və yaxud da restoran, iaşə müəssisələri ilə əhatələnib. Yaşıllıq baxımından baxsaq, Bakı ətrafında yaşıllıq elə də çox deyil. Amma ölkənin turistik zonalarında meşə, çay, dərə insanlar üçün daha rəngarəng olduğundan axın da daha çox həmin bölgələrə edilir".

Ekspert vurğulayıb ki, yerli turizmin inkişafı ölkə iqtisadiyyatının işlək vəziyyətə gətirib çıxarmasına səbəb olur: "Yəni bölgələrdə artıq yeni iş yerləri, iqtisadi yaxşılaşma, torpaq sahələrinin satışı, təkcə evlər deyil, kafe, restoran, hotel, hostellər və digər iaşə obyektləri həm işlək vəziyyətə gəlib çıxır, həm də artıq orada tələbat artır. Bu da işlə bağlı paytaxta axının təbii yolla qarşısını alır. Daxili turizmin inkişafı xarici ölkələrin turzim sektoruna yatırım etmək istəyən insanların o pulu Azərbaycana yatırmalarına gətirib çıxarır. Yəni pul ölkədə qalır”.

Sadiq Cavadov